Կարձանագրվի՞ սենսացիա Անի Մաջնունյանի սպանության գործում...

Լևոն Մութաֆյանը ֆեյսբուքյան իր էջում գրում է.

Երևի բնավ էլ պատահական չէր, որ հիրոմանտ Անի Մաջնունյանի սպանության մեջ մեղադրվող Մուշեղ-Մխիթար Մխիթարյանն իր թատրոնի համար ընտրել էր ,,Յանուս,, անվանումը՝ ,,փոխակերպվելով,, երկու դեմքով արարածի:

Պատահական չէր, որովհետև նրա կենսագրությունն արդեն հուշում է, որ նա ապրել է երկակի կյանքով, երկու տարիքով, երկու անունով, մի քանի կնոջ հետ և մի քանի ,,առասպելներով,,: Բայց նրա հորինած ,,առասպելներին,, արդեն գումարվում են քննչական ,,առասպելները,,, որոնք հուշում են, որ գործ ունենք խճճված կամ էլ արհեստականորեն խճճվող մի պատմության հետ…

Հանցագործությունից մեկ օր անց հայտարարվեց, որ կասկածյալները բերման են ենթարկվել, իսկ հետո էլ՝ Մուշեղ Մխիթարյանը ինքնախոստովանական ցուցմունք է տվել: Սակայն պարզվում է, որ ոչ մի ինքնախոստովանական ցուցմունք չկա, կան լղոզված ցուցմունքներ հանցագործության մեջ մեղադրվող անձի և նրա ,,ուղեկցուհու,, կողմից: Իսկ հիմա էլ, երբ դատարանը կայացրել է երկամսյա կալանքի որոշումը, Մուշեղ Մխիթարյանը հայտարարում է, որ չի ընդունում իրեն մեղսագրվածը, որ ինքը չէ հանցագործությունը կատարողը, իսկ նրա ուղեկցուհի Աննան, որը քննչական մարմինների կողմից ակնհայտորեն քողարկվում է և ստացել է ընդամենը վկայի կարգավիճակ, 180 աստիճանով փոխում է իր նախնական ցուցմունքը…

Եթե սկզբում նա ասել էր, որ Մուշեղի հետ եղել է Անի Մաջնունյանի բնակարանում և տեսնելով, որ Անին արդեն մահանում է՝ դուրս էր փախել, հիմա էլ ասում է, որ ինքը սպասել է դրսում և Անիի բնակարան է գնացել, երբ Մուշեղն արդեն սպանած է եղել հիրոմանտին… Ակնհայտ է, որ ոմանք հովանավորում են այս աղջկան, կամ էլ՝ իսկապես կան մեզ համար ,,անհասկանալի պահեր,, այս բացահայտման մեջ...

Ինչու՞ է Մուշեղ Մխիթարյանը հրաժարվում մեղադրանքից, ինչու՞ իրեն մեղավոր չի ճանաչում: Կամ, այդ դեպքում, ինչի՞ վրա է դնում հույսը, երբ, ըստ քննչական մարմնի, կա ականատես… Իհարկե, շատերն են հրաժարվում ընդունել մեղադրանքը, շատերն են փորձում մանևրել, սակայն այս դեպքում կարծես թե գործ ունենք մեկ այլ ,,ֆենոմենի,, հետ, որը կամ հոգեբանական-հոգեբուժական ենթատեքստ կարող է ունենալ, այսինքն, հանցագործությունը կատարվել է աֆեկտի ազդեցության ներքո, գրեթե անգիտակից վիճակում, ինչն էլ առաջացրել է մեկ այլ հետևանք՝ ինքնաժխտում, կամ էլ, հանցագործությունն իսկապես ունի այնպիսի ,,խորխորատներ,, , որոնք հասանելի չեն մեզ…

Եվ այս համատեքստում արդեն քննչական մարմիններիկողմից հովանավորվող Աննան ընդամենը այն եզակի ականատեսն է, որը ցուցմունք է տվել Մուշեղի դեմ, ուստիև հովանավորվում է: Հավանաբար, նրան բացատրել են, որ եթե ցուցմունք տա ընդդեմ Մուշեղը, ապա ինքը հանցակից չի դիտարկվի: Ահա ինչու հանցագործության ամենագործուն մասնակիցը, որը հայտարարել էր, թե գնացել էր Մուշեղի հետ՝ հանուն փողի, հիմա պնդում է, թե Մուշեղն իրեն շանտաժի է ենթարկել, թե ինքը միայն հանցագործությունը կատարելուց հետո է գնացել Անիի բնակարան... Իսկ այն ցուցմու՞նքը, որ երբ տեսել է խռխռացող Անիին, փախել է բնակարանից...

Մի բան հաստատ է, այս Աննան գործիք է քննիչների ձեռքին, որին վարպետորեն օգտագործում են...

Ինչևէ: Գուցե իսկապե՞ս սենսացիաներ արձանագրվեն այս գործում, գուցե լինեն ա՞յլ բացահայտումներ…

Միայն ավելացնենք, որ Անի Մաջնունյանի մոր այն ցավով արտահայտված խոսքը, թե Մուշեղը Անիի վստահությունը շահել է նրան ֆիլմում նկարահանելու առաջարկությամբ, կարող է համապատասխանել իրականությանը, քանի որ, մեր հստակ տեղեկությամբ, Մուշեղ Մխիթարյանը հայտարարել էր Ցեղասպանությանը նվիրված ֆիլմ նկարահանելու մտադրության մասին և, չգիտես ինչու, դերակատարներ էր փնտրում տարիքով և մենակ ապրող մարդկանց մեջ…