Հումանիստական ջրոցի` ըստ Ռուբեն Մելիքյանի. Ջրումը որպես վենդետտա արգելվում է

Արցախի ՄԻՊ Ռուբեն Մելիքյանը ֆեյսբուքյան իր էջում  գրել է.

Տղաներ և աղջիկներ,

Վաղը Վարդավառ է՝ իմ ամենասիրած տոնը։

Հավուր պատշաճի ջրումներ իրականացնելիս առաջարկում եմ օգտվել հետևյալ կանոններից (լրացված ու փոփոխված), որոնցով փորձ է կատարվում արտացոլել ու հավասարակշռել գոյություն ունեցող բոլոր իրավաչափ շահերը (ջրողների, ջրվողների, ակնհայտ հղի կանանց, զբոսաշրջիկների և այլն)։

«Կանոն 1. Արգելվում է ջրել 63 տարեկանից բարձր, 3 տարեկանից ցածր անձանց, ակնհայտ հղի կանանց, ինչպես նաև համազգեստ կրող իրավապահ մարմինների ծառայողներին։

Կանոն 2. Ջրումն իրականացվում է 16-28 C (60-82 F) ջերմաստիճանի առերևույթ մաքուր ջրով՝ դույլերով, այլ համանման տարաներով կամ մեխանիկական ջրամղիչ սարքերով՝ մարդու մկանային ուժի գործադրմամբ, իսկ բացառիկ դեպքերում՝ թույլ հզորության պոմպերի օգտագործմամբ։

Կանոն 3. Ջրելուց առաջ ջրողը պարտավոր է ջրվողի համար հասկանալի լեզվով տեղեկացնել վերջինիս ջրելու մտադրության մասին (պատշաճ ծանուցման պայման)։

Կանոն 4. Ջրողն իրավունք ունի ջրումն իրականացնել առանց սույն կանոնադրության 3-րդ կանոնով սահմանված պատշաճ ծանուցման, եթե «հիմնավոր կասկածից վեր» չափանիշով ակնհայտ է, որ ջրվողը հրաժարվել է ջրվելու մասին պատշաճ ծանացված լինելու իրավունքից՝ հրապարակային հայտարարությամբ, կոնկլյուդենտ գործողություններով կամ այլ համարժեք եղանակով։

Կանոն 5. Եթե ջրվելու մասին պատշաճ ծանուցված ջրվողը ներկայացնում է հիմնավոր պատճառ ջրվելու անհնարինության մասին, ապա ջրումը կասեցվում է մինչև հիմնավոր պատճառի վերացումը։

Կանոն 6. Սույն կանոնադրության 5-րդ կանոնում նշված պատճառի հիմնավորությունը գնահատում է ջրողը՝ ելնելով համաչափության, խտրականության անթույլատրելիության, մարդու արժանապատվության հարգման, սիրո ու հանդուրժողականության սկզբունքներից։

Կանոն 7. Առաջնային ջրվողն իրավունք ունի առաջնային ջրողին ջրել առանց պատշաճ ծանուցման (հակադարձ ջրման իրավունք)։

Կանոն 8. Պաշտոնատար անձ հանդիսացող առաջնային ջրվողն իրավասու չէ հակադարձ ջրման իրավունքն իրացնել ԱԱԾ-ի, ոստիկանության կամ իրավապահ այլ մարմինների միջոցով։

Կանոն 9. Սույն կանոնադրությամբ սահմանված կարգով առաջին անգամ ջրված զբոսաշրջիկներին ջրողը պարտավոր է պարզաբանել Վարդավառի հոգևոր-մշակութային նշանակությունը, ինչպես նաև հնարավորություն ստեղծել, որ ջրված զբոսաշրջիկն օգտվի 7-րդ կանոն սահմանված հակադարձ ջրման իրավունքից։

Հոդված վերջին։ Ջրումը որպես վենդետտա արգելվում է։»

Տարածել խնամքով։