Թուրք դատախազները փախել են Հայաստան․ Թուրքիայում նրանց ձերբակալման հրամանագիր է ստորագրվել

Թուրք նախկին դատախազը, որը հետաքննում էր կառավարությունում հեղաշրջման ենթադրյալ փորձը և առանձնապես խոշոր չափի կաշառքի դեպքերը, գործընկերոջ հետ Հայաստան է փախել այն բանից հետո, երբ երկուսի անունով էլ ձերբակալման հրամանագիր է ստորագրվել։ Այդ մասին գրում է թուրքական «Hürriyet Daily News» օրաթերթը՝ վկայակոչելով Արտվին նահանգի կառավարչի հայտարարությունը։

Պարբերականը հաղորդում է, որ Ստամբուլի Բաքիրքյոյ շրջանի գլխավոր դատախազի գրասենյակում նախկին դատախազներ Զեքերիա Օզի, Ջելալ Կարայի եւ Մեհմետ Յուզգեչի ձերբակալության հրամանագիր է ստորագրվել՝ զինված հեղաշրջում իրականացնելու եւ հանցավոր կազմակերպություն ստեղծելու մեղադրանքով։

Նշենք, որ 2013 թվի դեկտեմբերի 17-ին Թուրքիայում կոռուպցիայի խոշորագույն դեպքի վերաբերյալ հետաքննություն էր սկսվել, իսկ այս տարվա մայիսի 12-ին Օզի պաշտոնն իջեցրել էին՝ նրան հեռացնելով Ստամբուլի գլխավոր դատախազի պաշտոնից։  Ենթադրվում է, թե կոռուպցիայի վերոհիշյալ գործի մեջ ներքաշված են պետական գործիչներ եւ նրանց հարազատները, ինչպես նաեւ մի քանի աչքի ընկնող գործարար։  Դատավորների եւ դատախազների գերագույն խորհուրդը մայիսի 12-ին  պաշտոնից ազատել է երեք դատախազին էլ, ինչպես նաեւ դատախազ  Մուամեր Աքքաշին եւ դատավոր Սուլեյման Կարաչոլին, որոնք եւս մասնակցել էին կոռուպցիայի դեպքի քննությանը։

Հաղորդվել է, որ օգոստոսի 10-ին Զեքերիա Օզը Կարայի հետ միասին հեռացել է Թուրքիայից՝ ձերբակալության հրամանագրերի ստորագրումից մի քանի ժամ առաջ։  «Hürriyet» թերթին հայտնի է դարձել, որ Անկարան կապվել է Վրաստանի իշխանությունների հետ՝ փախստականների արտահանձնմանը հասնելու համար, բայց օգոստոսի  11-ին հյուսիս-արեւելյան Արտվին նահանգի կառավարիչ Քեմալ Ջիրիթը հայտարարել է, որ Օզը եւ Կարան անցել են Հայաստանի հետ սահմանը։

Հայաստանի ազգային անվտանգության ծառայությունից NEWS.am-ին հայտնեցին, որ նման տեղեկատվություն իրենք չունեն:

Աղբյուրը՝ NEWS.am