ՌԴ-ում հայտնաբերվել է ավիավթարից զոհված վերջին հայի դին

ՌԴ Իստրինսկի ջրամբարի մոտ՝ հիդրոպլանի եւ ուղղաթիռի վթարի վայրում, որոնողափրկարարական աշխատանքների արդյունքում հայտնաբերվել է աղետի վերջին՝ 9-րդ զոհի մարմինը, որը ենթադրաբար  ՀՀ  28-ամյա մի քաղաքացի է։ Այս մասին հայտնում է ռուսական Առաջին ալիքը։

Ռուսաստանի փոքր ավիացիան վատ տեխնիկական վիճակում է գտնվում, օդաչուները բավարար որակավորում չունեն, իսկ օդում իսկական քաոս է տիրում։ Այսպես է գնահատել միջադեպը ՌԴ Քննչական կոմիտեն։

Քննչական կոմիտեն Իստրինսկի ջրամբարի գործով հարուցել է արդեն 2-րդ քրեական գործը։ Որոնողափրկարական աշխատանքները դեպքի վայրում շարունակվում են արդեն 3 օր։ Նախօրեին հայտնաբերվել է վերջին զոհի դին, որը ենթադրաբար պատկանում է ՀՀ 28-ամյա մի քաղաքացու։

«Ռոբինսոն» ուղղաթիռի վերջին թռիչքը նկարահանվել էր սիրողական տեսախցիկով աղետից անմիջապես առաջ։ Կադրում երեւում է, թե ինչպես է ուղղաթիռը ցածր, առանց հնարքների հանգիստ թռիչք իրականացնում։ Դրանից մի քանի րոպե անց տեղի էր ունեցել բախումը։ Հաղորդվում է, որ հիդրոպլանի օդաչուն օդ էր բարձրացել՝ առանց ավիածառայության դիսպետչերին նախազգուշացնելու։

Հիշեցնենք, որ օգոստոսի 10-ին ՀՀ ՏԿԱԻՆ Ճգնաժամային կառավարման ազգային կենտրոն տեղեկություն է ստացվել, որ օգոստոսի 8-ին, ժամը 20.15-ին Մերձմոսկովյան Իստրինսկի շրջանի ջրամբարի մոտ տեղի ունեցած օդային աղետի արդյունքում “Սեսսնա 206″ մակնիշի ինքնաթիռի օդաչուն եւ ազգությամբ հայ 4 ուղեւորները զոհվել են:

ՌԴ ԱԻ նախարարության Մերձմոսկովյան մարզի եւ ՌԴ ՆԻ Մերձմոսկովյան մարզի գլխավոր վարչությունները ՌԴ-ում ՀՀ դեսպանությանը տրամադրել են զոհված քաղաքացիների անձնական տվյալները.

• Մանուկյան Պարույր Նորիկի (1987 թ. ծնված)

• Մանուկյան Լարիսա Վրեժի (1992 թ. ծնված)

• Գլչյան Օֆելյա Ազատի (2005 թ. ծնված)

• Գլչյան Էրիկ Ազատի (2007 թ. ծնված)

Ըստ վերոնշյալ մարմիններից ստացված տեղեկության` զոհվածները հանդիսացել են ՌԴ-ում մշտական բնակության թույլտվությամբ ՀՀ քաղաքացիներ: