Գեղարքունիքի մարզպետի մոտ քննարկվեցին Մարտունի քաղաքի ջրամատակարարման եւ ջրահեռացման համակարգում խնդիրները
ՀասարակությունԳԱՎԱՌ, 15 ՀՈՒՆԻՍԻ, ԱՐՄԵՆՊՐԵՍ: Գեղարքունիքի մարզպետ Իշխան Սաղաթելյանի մոտ հրավիրված հանդիպման ժամանակ Մարտունու քաղաքապետ Արմեն Ավետիսյանի, ավագանու բոլոր անդամների, ՀՀ էներգետիկայի եւ բնական պաշարների նախարարության ջրային տնտեսության պետական կոմիտեի եւ «Վեոլիա ջուր» ընկերության պատասխանատու պաշտոնյաների մասնակցությամբ քննարկվեցին Մարտունի քաղաքի ջրամատակարարման եւ ջրահեռացման համակարգում առաջացած խնդիրները:
Ինչպես հանդիպման սկզբում ներկայացրեց Մարտունու քաղաքապետ Արմեն Ավետիսյանը՝ իր պաշտոնավարման 1 տարի 8 ամիսների ընթացքում ջրամատակարարման եւ ջրահեռացման համակարգը սպասարկող «Վեոլիա ջուր» ընկերությանը քաղաքային իշխանությունների կողմից համակարգում առաջացած բազմաբնույթ խնդիրների շուրջ ուղղվել են բազմաթիվ գրություններ եւ առաջարկություններ, սակայն որեւէ հարց չի կարգավորվել, որեւէ առաջարկություն չի ընդունվել, սպասարկող կազմակերպության կողմից որեւէ ներդրում չի կատարվել:
«Խնդիրները բազմազան են եւ բնակչությանն ամենօրյա հոգսեր պատճառող, որոնց կարգավորման համար այդպես էլ չենք կարողանում ելք գտնել, քանի որ մեր համագործակցված աշխատանքը չի ստացվում, այն դեպքում, երբ քաղաքապետարանը եւ համայնքի ավագանին 2016 թվականին պայմանագիր են կնքել «Հայջրմուղկոյուղի» ընկերության հետ, որտեղ հստակ ֆիքսված են համակարգում սպասարկող կողմից ներդրումներ կատարելու, ինչպես նաեւ առաջացած խնդիրները կարգավորելու պարտավորությունները: Հիմա մենք հարցը հստակ ենք դնում. կամ ավագանու որոշմամբ դադարեցնում ենք պայմանագիրը եւ համակարգը վերցնում համայնքի սպասարկման տիրույթ, կամ սպասարկող կառույցը՝ տվյալ դեպքում «Վեոլիա ջուրը», հստակեցնում է իր պարտավորությունների շրջանակը»,-ներկայացրեց Մարտունու քաղաքապետը:
«Թաղամասեր կան, որտեղ պետք է խմելու ջրագիծ անցկացվի, թաղամասեր կան, որտեղ կոյուղագիծ նորոգելու կամ կառուցելու խնդիր է առաջացել, բայց գործող կարգով ոչինչ չենք կարողանում ձեռնարկել: Մանկապարտեզներում, բազմաբնակարան շենքերում լուրջ խնդիրներ են առաջացել թե՛ ջրամատակարարման, թե՛ ջրահեռացման ոլորտներում, բայց մեր ուժերից վեր է սպասարկման ապահովումը: Մինչդեռ «Վեոլիա ջուր» ընկերությունը մեր քաղաքում զբաղված է միայն գումարներ գանձելով եւ դատական ակտերի միջոցով տուգանքներ սահմանելով»,-իրենց դժգոհությունն արտահայտեցին համայնքի ավագանու անդամները:
«Վեոլիա ջուր» ընկերության պատասխանատուները ներկայացրին, որ իրենք գործում են 2017 թվականի հունվարի 1-ից, ՀՀ կառավարության հետ կնքված համապատասխան պայմանագրի շրջանակներում՝ չհանդիսանալով «Հայջրմուղկոյուղի» ընկերության իրավահաջորդը, ուստի եւ իրավասու չեն պահանջվող ներդրումներ կատարելու կամ շինարարական համապատասխան աշխատանքներ իրականացնելու համար:
«Մենք, համաձայն ՀՀ կառավարության հետ կնքված համապատասխան պայմանագրի, տարեկան պետությանը տալիս ենք 80 միլիարդ դրամ վարձավճար, 2,5 միլիարդ էլ տալիս ենք նոր ներդրումներ կատարելու համար, ուստի եւ ներդրումների հարցը ոչ թե մեր, այլ կառավարության խնդիրն է:Նոր ջրամատակարարման եւ ջրահեռացման ցանցերի կառուցումն ու շահագործումն էլ դուրս է մեր իրավասությունից: Մեր իրավասության մեջ է հաշվիչի տեղադրումը եւ ներքին ցանցին միացում տալը, որը կատարվում է բացառապես անվճար հիմունքներով: Բացի այդ, պետության կողմից մեր տնօրինությանն է հանձնված Մարտունի քաղաքի ջրամատակարարման եւ ջրահեռացման ոչ ամբողջական համակարգը, ուստի եւ շատ խնդիրներ եւս դուրս են մնում մեր իրավասության շրջանակներից»,-պարզաբանեցին «Վեոլիա ջուր» ընկերության պատասխանատուները:
Գեղարքունիքի մարզպետ Իշխան Սաղաթելյանն առաջարկեց կողմերին՝ համատեղ լուծումներ գտնել եւ ստեղծված իրավիճակից դուրս գալ արդյունավետ քայլեր ձեռնարկելու ճանապարհով:«Քննարկումը թեեւ շատ հախուռն ստացվեց, բայց խնդիրը բավականին բարդ ու նուրբ է, որը պահանջում է ավելի գլոբալ մոտեցում:Որքան հասկացա, շատ հարցերի կարգավորում գտնվում է պետության իրավասության շրջանակներում, շատ հարցերի լուծմանն էլ խանգարում է օրենսդրական դաշտը: Դրա համար պետական համապատասխան մարմինները պետք է ունենան իրենց կարգավորիչ դերը, իսկ կողմերը պետք է աշխատեն փոխըմբռնման պայմաններում: Հասկանալի է, որ սպասարկող կողմը որոշ դեպքերում պետք է ընդառաջի եւ՛ բնակչության եւ՛ քաղաքի իշխանությունների կարիքներին, մինչեւ որ մենք կարողանանք համատեղ ուժերով գտնել ամենաարդյունավետ լուծումները: Իսկ որ այստեղ խնդիրները հրատապ կարգավորում են պահանջում, այլ կարծիք չի կարող լինել»,-եզրափակեց մարզպետ Իշխան Սաղաթելյանը:
1
2
3
4
5
1
2
3
4
5
5
