ՊՊԾ գունդը գրաված զինված խմբի անդամ Հովհաննես Հարությունյանն ազատ է արձակվել

ԵՐԵՎԱՆ, 15 ՀՈՒՆԻՍԻ, ԱՐՄԵՆՊՐԵՍ: Երևան քաղաքի Ընդհանուր իրավասության դատարանը բավարարել է ոստիկանության պարեկապահակային ծառայության գունդը գրաված զինված խմբի անդամ Հովհաննես Հարությունյանի խափանման միջոցը փոխելու միջնորդությունը: Ինչպես հաղորդում է «Արմենպրես»-ը, Հովհաննես Հարությունյանը դատարանի դահլիճից ազատ արձակվեց:

Հովհաննես Հարությունյանի խափանման միջոց կալանքը փոխելու անձնական երաշխավորությամբ էին հանդես եկել ԱԺ «Ծառուկյան» խմբակցության պատգամավորները:

Մինչ այդ ազատ էին արձակվել ՊՊԾ գունդը գրաված զինված խմբի անդամներ Արեգ Կյուրեղյանը, Տիգրան Սարգսյանը, Հովհաննես Վարդանյանը, Արամ Մանուկյանը, Արամ Հակոբյանը, Սեդրակ Նազարյանը, Արթուր Մելքոնյանը և Արթուր Սողոմոնյանը։

Հովհաննես Հարությունյանին մեղադրանք էր առաջադրվել 219 րդ հոդված 3-րդ մաս 1-ին կետով և 235 հոդվածի 3-րդ մասով `  շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը՝ զուգորդված՝ դրանք ոչնչացնելու կամ վնասելու սպառնալիքով, որը կատարվել է զավթածն ազատելու պայմանով պետությանը, կազմակերպությանը կամ քաղաքացուն որևէ գործողություն կատարելուն կամ որևէ գործողություն կատարելուց ձեռնպահ մնալուն հարկադրելու նպատակով, որը կատարվել է կազմակերպված խմբի կողմից և ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը կազմակերպված խմբի կողմից:

Լուսանկարը՝ Aysor.am-ի