«ԳեոՊրոՄայնինգ գոլդ»-ը մի շարք միջոցառումներ է կազմակերպել՝ նվիրված երեխաների պաշտպանության միջազգային օրվան

ԵՐԵՎԱՆ, 2 ՀՈՒՆԻՍԻ, ԱՐՄԵՆՊՐԵՍ: «ԳեոՊրոՄայնինգ» դիվերսիֆիկացված հանքարդյունաբերական միջազգային ընկերությունների խումբը  Երեխաների պաշտպանության օրվան նվիրված մի շարք տոնական միջոցառումներ է կազմակերպել, որոնց մասնակցել է հատուկ այդ նպատակով Հայաստան ժամանած «ԳեոՊրոՄայնինգ» ընկերությունների խմբի նախագահ Ռոման Խուդոլին։

Տոնական միջոցառումների շրջանակում ընկերությունը իրականացրել է Արարատ քաղաքի մանկապարտեզի երկու նոր մասնաշենքի բացման արարողությունը: Դրանք վերանորոգվել են ընկերության միջոցներով և այնուհետև կահավորվել հարմարավետ, գեղեցիկ մանկական կահույքով։

Վարդենիս և Արարատ քաղաքներում, որտեղ «ԳեոՊրոՄայնինգը» իրականացնում է իր գործունեությունը, երեխաների համար կազմակերպվել են ուրախ և գեղեցիկ միջոցառումներ, որոնց ընթացքում անցկացվել են մրցույթներ ու խաղեր, բոլոր մասնակիցները ստացել են նվերներ։ Համերգային ծրագրի ընթացքում երեխաներին այցելել են ծաղրածուներ, երեխաների կողմից սիրված մուլտֆիլմերի հերոսներ, ինչպես նաև ելույթ են ունեցել հայկական էստրադայի երիտասարդ աստղերը։

Առանձին մանկական ծրագիր և ֆինանսական օգնություն էր կազմակերպվել նաև սահմանափակ հնարավորություններ ունեցող երեխաների համար, որոնք ընկերության առանձնակի ուշադրության կենտրոնում են գտնվում արդեն 11 տարի։

«Աճող սերնդի զարգացմանը ուղղված սոցիալական ծրագրերը մեր ընկերության սոցիալական քաղաքականության առանցքային մասն են կազմում։ Պարզ ծրագրերը, որոնք մեզնից շատ ուժ ու ժամանակ չեն խլում, կարող են օգնել փոխելու հարյուրավոր երեխաների կյանքը, նրանց նվիրելու ապագայի հույսեր։ Ընկերությունը առանձնահատուկ ուշադրություն է դարձնում հաշմանդամ երեխաներին աջակցության ծրագրին։ Քչերը կարող են ամբողջությամբ պատկերացնել հոգեբանական, սոցիալական, նյութական խնդիրների այն ամբողջ ծավալը, որոնց հետ ամեն օր բախվում են հաշմանդամ երեխաները և նրանց ծնողները։ Մենք մեր ուժերի սահմաններում  օգնում ենք, որպեսզի այդ երեխաների կյանքը ավելի հեշտ ու հարմարավետ դառնա …», - «Արմենպրես»-ի հաղորդմամբ՝ ասել է ընկերության նախագահ Ռոման Խուդոլին։

 

 

 

 

 

 

Դեռ  2012 թվականից «ԳեոՊրոՄայնինգը» Հայաստանում սկսել է իրականացնել հայ ուսանողների՝ Հայաստանի ու Ռուսաստանի բուհերում հանքարդյունաբերական մասնագիտությունների ուսման ծրագիրը։ Ուսումն ավարտելուց հետո «ԳեոՊրոՄայնինգը» երիտասարդ մասնագետներին աշխատանքի է տեղավորում Հայաստանյան իր ձեռնարկություններում։ Ծրագրի առաջին հինգ մասնակիցներն արդեն ավարտել են Սանկտ Պետերբուրգի պետական լեռնագործության ինստիտուտը և Երևանի պետական համալսարանը։ Ծրագրի շրջանակում ԲՈՒՀ-երում ուսանելու ընթացքում «ԳեոՊրոՄայնինգը» ապահովում է ուսանողների ապրուստը, ավիափոխադրումների ծախսերը, բժշկական ապահովագրությունը և տրամադրում նրանց ամսական թոշակները։

Երեխաների պաշտպանության օրվա միջոցառումների շրջանակում ընկերության ղեկավարությունը պայմանագրեր է կնքել Արարատ քաղաքի և Արարատ գյուղի դիմորդների հետ՝ նրանց ուսումը Սանկտ Պետերբուրգի լեռնագործական ինստիտուտում անցկացնելու վերաբերյալ։ Լեռնագործական ֆակուլտետ ընդունված ուսանողները սեպտեմբերին արդեն կմեկնեն Սանկտ Պետերբուրգ։

«Բարձր որակավորում ունեցող աշխատողների ընտրությունը ընկերության հաջողության առանցքային ռազմավարություններից մեկն է։ Որպես երկարաժամկետ պատասխանատու ներդրող՝ «ԳեոՊրոՄայնինգը» մեծ ուշադրություն է հատկացնում աշխատողների ընտրությանը։ Մենք շահագրգռված ենք, որպեսզի ունենանք պրոֆեսիոնալ և նվիրված աշխատողներ և մեծ խանդավառությամբ ենք զարգացնում ուսանողների կրթական ծրագիրը, որովհետև համոզված ենք, որ այդ նախաձեռնությամբ կլուծենք ընկերությունը որակյալ կադրերով ապահովելու խնդիրը։ Ծրագիրը երկրի մասշտաբով կնպաստի նաև, որպեսզի ՀՀ ռեգիոններում աշխատանքի տեղավորման նոր հեռանկարներ ստանալով՝ աշխատունակ բնակությունը դադարեցնի երկրից հեռանալու գործընթացը» - ասել է ԳՊՄ նախագահ Ռոման Խուդոլին։   

«ԳեոՊրոՄայնինգ» ընկերությունների խումբը մետաղների դիվերսիֆիկացված բազա ունեցող դինամիկ զարգացող միջազգային մասնավոր ընկերություն է։ Հայաստանում «ԳեոՊրոՄայնինգին» են պատկանում երկու ձեռնարկություն՝ Ագարակի պղնձամոլիբդենային կոմբինատը և «ԳեոՊրոՄայնինգ» ընկերությունը։ «ԳեոՊրոՄայնինգ գոլդը» շահագործում է Սոթքի ոսկու հանքը և Արարատի ոսկու կորզման ֆաբրիկան։

Հայկական շուկա մտնելու պահից ի վեր «ԳեոՊրոՄայնինգը» սոցիալական ոլորտի զարգացման համար ներդրել է 8 մլն դոլար: