Կենտրոնի փոխտնօրենը բողոքում է, ծառայության ղեկավարը՝ հերքում

«Բարվա» ինովացիոն կենտրոնի հիմնադիր նախագահ, տեխնիկական գիտությունների դոկտոր Արամ Վարդանյանը օրերս նամակով դիմել է վարչապետ Նիկոլ Փաշինյանին՝ ահազանգելով Հայաստանի հակակարկտային կայանների անարդյունավետության պատճառների մասին:

Նույն կենտրոնի փոխտնօրեն Արման Վարդանյանի ներկայացմամբ, անիմաստ աղմուկն այն մասին, որ կայանները լավ չեն աշխատում, որոշ մարդկանց մանիպուլյացիայի արդյունք է: «Որոշ մարդիկ», ըստ Վարդանյանի, ԱԻՆ «Հիդրոօդերևութաբանության և մթնոլորտային երևույթների վրա ակտիվ ներգործության» ծառայության տնօրենի տեղակալ ու հակակարկտային ծառայության ղեկավար Սուրեն Հովսեփյանն է, ով փոխարինել է հորը՝ Ռոբերտ Հովսեփյանին:

«Բարվա»-ի փոխտնօրենի խոսքով, Հովսեփյաններն ամեն կերպ հակազդում են նորարարական տեխնոլոգիաների ներդրմանը: Վարդանյանը նշում է, որ Հովսեփյանների կողմից ժամանակ առ ժամանակ առաջարկվում է կիրառել հրթիռներ, կարկտապաշտպան ցանցեր, ինչպես նաև նրանց հետ փոխկապակցված ընկերությունների կողմից արտադրված անորակ նմանատիպ սարքեր` մոլորության մեջ գցելով ԱԻՆ ղեկավար կազմին։ Իսկ «Բարվա»-ի կողմից առաջարկվող ամենաարդիական տեխնոլոգիաներն ու սարքավորումները հաճախ մնում են անտեսված, ինչն էլ բերում է կարկտահարության կրկնվող դեպքերի:

«Բարվա» ինովացիոն կենտրոնը 2006թ.-ից առ այսօր իրականացնում է մթնոլորտում կարկտային գոյացությունների վաղ հայտնաբերման և վնասազերծման սարքավորումների մշակում ու արտադրություն «Զենիթ» ապրանքանիշի ներքո: Արտադրվել և տեղակայվել են ավելի քան 600 միավոր նմանատիպ սարքեր, որոնք շահագործվում են ոչ միայն Հայաստանում ու ԼՂՀ-ում, այլև արտահանվում են ՌԴ, Վրաստան, Իրան, Ուկրաինա, Լեհաստան և Թուրքիա: Բայց, ըստ Արման Վարդանյանի՝ «Բարվա»-ի կայանները հետաքրքրում են միայն առանձին համայնքներին ու մասնավոր սեկտորին:

Կենտրոնի փոխտնօրենի խոսքով, ժամանակին գործարկման դեպքում իրենց սարքերը կարող են ապահովել մինչև 90% արդյունավետություն, որը հաստատվել է նաև փորձագիտական եզրակացություններով: Սակայն պատկան մարմիններին ուղղված առաջարկները կամ անարձագանք են մնացել, կամ էլ՝ մերժվել:

«Մեր ընկերության առաջ արհեստական խոչընդոտներ են ստեղծվել։ Նույնիսկ առաջարկել ենք գործող ռադարները փոխարինել շատ ավելի էժան՝ եվրոպական արտադրության մինի ռադարներով, պատասխանել են՝ նպատակահարմար չէ»,- ասում է Վարդանյանը։ «Բարվա»-ի ղեկավարությունը սխալ է համարում նաև հրթիռային համակարգի օգտագործումը՝ ասելով, թե եվրոպական երկրներում վաղուց այն չի կիրառվում։

ԱԻՆ հակակարկտային ծառայության ղեկավար Սուրեն Հովսեփյանը Past.am-ի հետ զրույցում հակառակը պնդեց՝ նշելով, թե հրթիռային համակարգը հակակարկտային պաշտպանության ամենաարդյունավետ եղանակն է․ «Դիմել ենք հեղինակավոր կազմակերպությունների, որպեսզի ՀՀ պաշտպանության ուսումնասիրություն իրականացվի և ծրագիր գրվի: Այդ ծրագիրը գրվել է միջազգային օդերևութաբանական կազմակերպության փորձագետների ու ակադեմիկոսների կողմից, որտեղ հստակ նշված է, որ Հայաստանում պետք է իրականացվի պաշտպանության համակցված եղանակ: Կախված ՀՀ երկրապատկերից՝ այստեղ մեկ եղանակով հնարավոր չէ պաշտպանություն իրականացնել: Դրա համար կիրառվելու են և՛ հրթիռային, և՛ գազագեներատորային կայանքներ, և՛ ցանցեր»: Հովսեփյանը տարօրինակ չի համարում, որ նույն պաշտոնում ինքն է փոխարինել 40 տարի Հակակարկտային ծառայության ղեկավար աշխատած հորը։ «Հայրս է եղել, հիմա՝ ես եմ, դա հանցագործությո՞ւն է: Օրենքը թույլ է տալիս: Ես էլ տեխնիկական գիտությունների թեկնածու եմ այդ գծով, արտասահմանում կրթություն եմ ստացել»,-ասաց։

Կայանի տնօրենը նաև նշեց, որ իրենք «Բարվա» ՍՊԸ-ի հետ համագործակցել են, տեղադրել 377 կայան, բայցև հավելեց, որ «նրանց կայանները հաճախ են խափանվում»։

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ