Հրաժարվեց «սպեցնազ»-ում ծառայել. զոհված զինծառայողը երազում էր բանակից փառքով վերադառնալու մասին (ֆոտո)

NEWS.am-ը գրում է.

Ավելի քան 8 տարի քիքբոքսինգով զբաղվող նորակոչիկ Սամվելին դեռ Կենտրոնական հավաքակայանում էին առաջարկել ծառայել հատուկ նշանակության ջոկատում: Սակայն 18-ամյա երիտասարդը ծառայության էր մեկնել այլ նպատակով՝ ծառայել ԼՂՀ-ում եւ դիրքերում:

«Տղաս շատ-շատ էր ուզում Ղարաբաղ գնալ, թուրք խփեր, հենց էդպես էլ ասում էր. «Մամա, պիտի գնամ, կռվեմ, թուրքին խփեմ, մեր հայրենիքը պաշտպանեմ, պոստ պահեմ, իմ անունը պիտի հնչի»… Տղաս խոսքը պահեց, բայց չվերադարձավ պոստերից էդպես էլ»,- NEWS.am-ի թղթակցին պատմում է 5 ամիս առաջ դիվերսիայի հետեւանքով զոհված Սամվելի մայրը՝ տիկին Մարինեն:

Սամվելին Ստեփանակերտում նույնպես առաջարկել էին մտնել հատուկ նշանակության ջոկատ, նա նորից էր հրաժարվել եւ ինքնակամ մեկնել «Եղնիկներ»: Տիկին Մարինեի խոսքով՝ երբ երդման արարողությանը գնացել եւ տեսել է զորամասը, «սիրտը կանգնել» է. «2014թ. փետրվարն էր, ցուրտ եղանակ, Արարատի մարզից մի կերպ հասանք «Եղնիկներ», գնացի, ասում եմ՝ Սամվել ջան, ի՞նչ տեղ ես ընկել: Տղաս էլ, թե մամ ջան, չնեղվես, շատ լավ ա էստեղ, շատ հոգ եմ: 1 տարի 4 ամիս ծառայեց, մի օր չդժգոհեց»:

1 տարվա ծառայող էր, երբ Սամվելի փոքր եղբայրն էլ մեկնեց ծառայության: Երկու եղբայր միասին նույն զորամասում էին ծառայում: 2 ամիս էր չէր անցել, երբ դիվերսիայի հետեւանքով Սամվելը գլխից վիրավորում է ստանում:

«Մարտի 17-ին գնացինք ամուսնուս հետ առեւտուր անելու, քաղցր շատ էր սիրում Սամվելս: Հենց հաջորդ օրն էլ տուլիկը պիտի ուղարկեինք: Բայց խոսեցինք հետը, ասաց՝ մամ ջան, ինձ դասերի են տարել, շաբաթ օրը՝ մարտի 21-ին, կուղարկեք: Փորձեցի համոզել, բայց չհամոզվեց: Բայց հակառակորդի դիվերսիան մեր բոլոր ծրագրերը խառնեց»,- շարունակում է տիկին Մարինեն:

Սամվելի ասած «դասը» դիրքերն էին. Զինծառայողը ծնողներից թաքցրել էր, որ նորից բարձրացել է դիրքեր: Մարտի 19-ին Ստեփանակերտից զանգել էին եւ Սամվելի ծնողներին հայտնել, թե իրենց որդին ոտքից վիրավորվել է: Հայրն անմիջապես մեկնել էր Արցախ եւ տեղում իմացել, որ որդին գլխից է վիրավորվել, կոմայի մեջ է: Բժիշկներն ուղիղ 1 շաբաթ արել էին ամեն ինչ՝ 19-ամյա զինծառայողի կյանքը փրկելու համար, բայց անհաջող:

«Բժիշկներից շատ գոհ ենք, էնքան հոգատար էին, ամեն ինչ արեցին, բայց տղաս այդպես էլ գիտակցության չեկավ»,- պատմում է տիկին Մարինեն:

Նշենք, որ Սամվել Հակոբյանն Արարատի մարզի Արեւաբույր գյուղից էր: Նա ծառայության էր մեկնել 2013թ. դեկտեմբերի 5-ին:

Հիշեցնենք, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խմբի հարձակման ժամանակ հակառակորդին դիմագրավելու ժամանակ արիաբար զոհվել էին ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են: 7 օր անց վիրավորված զինծառայողներից Սամվել Հակոբյանը Ստեփանակերտի հոսպիտալում մահացել էր:

Աիդա Հովհաննիսյան