Բոլոնյան գործընթացն առաջընթաց է գրանցել. Լատվիայի ԿԳ նախարար

Ի հեճուկս քննադատությունների՝ ակնհայտ է, որ Բոլոնյան գործընթացն առջընթաց է գրանցել: Այս մասին Եվրոպական բարձրագույն կրթական տարածքի նախարարական գագաթնաժողովի և Բոլոնիայի քաղաքականության 4-րդ ֆորումի ընթացքում նշեց Լատվիայի Հանրապետության կրթության և գիտության նախարար Մարիտե Սեյլեն: «Բոլոնիայի գործընացը հաղթահարել է մարտահրավերները: Որակավորումների ճանաչումը դարձել է ավելի թափանցիկ, և ուսանողները միջազգային առումով ավելի մրցունակ են: Այսօր շատ են խոչընդոտները, բայց որոշ երկրներում դրանք այնքան էլ ակնհայտ չեն»,- նշեց Մարիտե Սեյլեն:

Լատվիայի Հանրապետության կրթության և գիտության նախարարի խոսքով՝ բուհերը միայն հմտություններ ու գիտելիքներ չեն հաղորդում, դրանք գիտելիքներ են ստեղծում:
«Մենք այսօր խոսում ենք ստեղծարար բարձրագույն կրթության մասին: Այս երկու օրում պետք է վերլուծենք առկա խնդիրները և նախագծենք ռազմավարություն՝ հետագայի համար: Մենք շատ հագեցած երկու օր ենք ունենալու»,-նշեց նա՝ հավելելով, որ անհրաժեշտ է առաջ ընթանալ՝ հաշվի առնելով քաղված դասերը:

Երևանում անցկացվում են Եվրոպական բարձրագույն կրթական տարածքի նախարարական գագաթնաժողովը և Բոլոնիայի քաղաքականության 4-րդ ֆորումը: Բոլոնիայի գործընթացի առանցքային նպատակներից են Եվրոպական բարձրագույն կրթական տարածքի ստեղծումը, որը կոչված է խթանելու Եվրոպական բարձրագույն կրթական համակարգի մրցունակությունը և գրավչությունը, ինչպես նաև ուսանողների շարժունությունն ու աշխատանքի հնարավորությունները:

Բոլոնիայի գործընթացն ընդգրկում է 47 եվրոպական երկիր, 10 խորհրդատու կազմակերպություն և այլ գործընկեր կազմակերպություններ: Բոլոնիայի գործընթացի հիմնական բաղադրիչներն են եռաստիճան կրթական համակարգը, որակավորումների շրջանակը, կրեդիտների կուտակման և փոխանցման համակարգը, դիպլոմի հավելվածը, որակի ապահովումը, փոխճանաչումը, համատեղ աստիճանների հավատագրման եվրոպական մոտեցումը: