Վայոց ձորի ճամբարից երեխաների հոսպիտալացման պատճառը հայտնի կլինի մեկ շաբաթից

NEWS.am-ը գրում է.

Մոտ մեկ շաբաթից պարզ կլինի Վայոց ձորի մարզի հանգստյան տներից մեկում ձեւավորված մանկական ճամբարից երեխաների հոսպիտալացման պատճառը: Այս մասին NEWS.am-ի թղթակցի հետ զրույցում ասաց ՍԱՊԾ մամուլի քարտուղար Նվարդ Առաքելյանը:

Նա նշեց, որ նույն օրը սննդամթերքի անվտանգության ծառայության տեսուչները տեղում ուսումնասիրություն են արել, առկա սննդամթերքն ուղարկել լաբորատոր փորձաքննության: Եզրակացությունը ստանալուց հետո պարզ կլինի՝ երեխաների աղեստամոքսային խանգարման պատճառը սննդային գործոնն է:

Ավելի  վաղ հայտնել էինք, որ Վայոց ձորի մարզի հանգստյան տներից մեկում ձեւավորված մանկական ճամբարից 16 երեխա այսօր՝ օգոստոսի 7-ին, աղեստամոքսային գանգատներով հոսպիտալացվել է Վայքի բժշկական կենտրոնի ինֆեկցիոն բաժանմունք: NEWS.am-ը առողջապահության նախարարությունից տեղեկացավ, որ բոլոր երեխաների մոտ դիտվել է որովայնի շրջանում ցավեր, գլխացավ, թուլություն, միայն 2-ի մոտ` նաեւ ջերմություն եւ փսխում: Երեխաների վիճակը գնահատվել է թեթեւ եւ միջին ծանրության: Առողջապահության նախարարության մասնագետների խումբն անմիջապես մեկնել է դեպքի վայր եւ պարզել է, որ նախօրեին երեխաներից 2-ի մոտ նկատվել է թուլություն, գլխապտույտ, ջերմություն, որոնց նկատմամբ կազմակերպվել է բուժում, սակայն առավոտյան նրանք հոսպիտալացվել են: Կազմակերպված հետազոտության արդյունքում հայտնաբերվել են այլ երեխաներ եւս, որոնք նույնպես հոսպիտալացվել են:

Հիվանդության առաջացման պատճառի հայտնաբերման նպատակով քննարկվել են եւ սննդային, եւ ջրային գործունները, կազմակերպվել են նմուշառումներ` թե խմելու ջրի ցանցից, թե երեխաներին մատակարարվող սննդից, ուսումնասիրվել են խոհանոցի եւ երեխաների կեցության պայմանները, ինչպես հիվանդներից, այնպես էլ կոնտակտավորներից ապահովվել են նմուշառումներ լաբորատոր հետազոտությունների համար: Կազմակերպվել են ախտահանման աշխատանքներ խոհանոցում, ննջասենյակներում, սանհանգույցում:

Ներկա դրությամբ ճամբարում հիվանդ երեխաներ չկան, իսկ հոսպիտալացված բոլոր երեխաները լավացումով դուրս են գրվել: