Անի Մաջնունյանի սպանության մեջ կասկածվողը հանցավոր անցյալ չունի. հարեւաններ

NEWS.am-ը գրում է.

«Վեցերորդ զգայարան» հաղորդաշարից հայտնի էքստրասենս Անի Մաջնունյանի սպանության մեջ կասկածվող Մուշեղ Մխիթարյանը հանցավոր անցյալ չունի, ոստիկանության հետ խնդիրներ երբեւէ չի ունեցել: Այս մասին NEWS.am-ի թղթակցի հետ զրույցում պատմեցին նրա հարեւանները:

«Վատ անունով աչքի չի ընկել, չենք տեսել, որ կռիվների մեջ լինի: Համեստ, խելոք երեխա է: Չենք տեսել, որ ձայնը բարձրացնի: Չեմ հավատում, որ նման բան կարար աներ»,- պատմեց հարեւան Հարություն պապիկը, որը նրան մանկությունից գիտի: Մուշեղը 10 տարի մոր հետ ապրել է Նորագավիթում, մոր մահից հետո է միայն տեղափոխվել Երեւան: «Տանջված տղա է, հիվանդ մորն էր պահում, երկու տարի առաջ մայրը մահացավ, տունը ծախեց, գնաց»,- ասացին հարեւանները՝ հավելելով, որ ծանր սոցիալական պայմաններում են ապրել:

Նշենք, որ դեպքի առիթով Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 104 հոդվածի 2-րդ մասի 8-րդ կետով (սպանություն՝ զուգորդված ավազակությամբ)։

Ավելի վաղ տեղեկացրել էինք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել է «6-րդ զգայարան» հաղորդաշարի էքստրասենս, 53-ամյա Անի Մաջնունյանի դին՝ բազմաթիվ ծակած-կտրած վնասվածքներով: Նշենք, որ Անի Մաջնունյանը մենակ էր ապրում, ամուսնացած չէր:

Հարեւանները NEWS.am-ի թղթակցին պատմել էին, որ ոչ մի ձայն չեն լսել, արտառոց բան չեն նկատել: