Ես Անիի տանը եղել եմ, սովորական ապրող էր, շքեղություններ չտեսա. Մերի Մակարյան

Ես Անիի տանը եղել եմ հյուր, սովորական ապրող էր, որպես այդպիսին շքեղություններ ցուցադրված չէին: Այս մասին NEWS.am-ի թղթակցի հետ զրույցում ասաց «Վեցերորդ զգայարան» հաղորդման վարող Մերի Մակարյանը՝ պատասխանելով հարցին, թե ինչ ուներ Անին, որը ցանկանում էին գողանալ:

Նա էքստրանս Անի Մաջնունյանին վերջին անգամ տեսել է փետրվարին՝ վերջին նկարահանումների համար: «Շատ լավ հարաբերություններ մեջ էինք, բարի, դրական, միշտ ժպտում էր, մի քիչ դժվար էր տանում նկարահանումը, որովհետեւ գրաֆիկը ծանր էր, մի օրում՝ երեք նկարահանում: Ես իր տանն եմ եղել հյուր, շատ լավ մարդ էր, որպես այդպիսին շքեղություններ ցուցադրված չէին, սովորական ապրող էր»,-ասաց հաղորդավարը:

Նա նշեց, որ իր վերաբերյալ էքստրասենսը որեւէ կանխատեսում չի արել, իսկ Անի Մաջնունյանի կյանքի վերաբերյալ հաղորդման մասնակիցների կողմից կանխատեսման դեպքեր չհիշեց:

Մերի Մակարյանը նշեց, որ չի կարող ասել, թե ինչն է եղել նման ոճրագործության պատճառ, դա կպարզեն իրավապահները: Արդյոք «Վեցերորդ զգայարան» հաղորդման ապագան վտանգի տակ է, թե ոչ,հաղորդավարն ասաց, որ որեւէ բան չի կարող ասել:

Նշենք, որ Անի Մաջնունյանը մասնակցել է «Վեցերորդ զգայարան» հաղորդման 1-ին եւ 2-րդ եթերաշրջանների հաղորդումներին, վերջին նկարահանումները, որոնց մասնակցել է սպանված էքստրասենսը, փետրվարին էին, դրանից հետո նրա հետ որպես այդպիսին շփում չի եղել, ընդամենը մի քանի անգամ հաղորդման ադմինիստրատիվ անձնակազմի հետ է շփումներ եղել: Երկրորդ եթերաշրջանից դեռ 2 հաղորդում է մնացել Անիի մասնակցությամբ, որոնք պետք է եթեր հեռարձակվեին սեպտեմբերին: 3-րդ եթերաշրջանի նկարահանումներին Անի Մաջնունյանը չի մասնակցել առողջական խնդիրների պատճառով:  

Ավելի վաղ հայտնել էինք, որ Երեւանում օգոստոսի 5-ին Մազմանյան 5 շենքի թիվ 20 բնակարանում հայտնաբերված «6-րդ Զգայարան» հաղորդաշարի էքստրասենս՝ 53-ամյա Անի Մաջնունյանի դիակի վրա եղել են բազմաթիվ ծակած-կտրած վնասվածքներ: Փրկարարները սպանվածի բնակարան են գնացել հարազատների ահազանգով, որ դուռը ներսից փակ է եւ դռան թակոցներին արձագանքող չկա:

Նշենք, որ Անի Մաջնունյանը բնակվում էր միայնակ, ամուսնացած չէր:

Հարեւանները NEWS.am-ի թղթակցին պատմել էին, որ ոչ  մի ձայն չեն լսել, արտառոց բան չեն նկատել:

Աղբյուրը՝ NEWS.am