Մեկնարկել է «Ես եմ իմ քաղաքի զբոսավարը» երիտասարդական-կամավորական ծրագիրը

Երևանի քաղաքապետարանի տուրիզմի բաժնի նախաձեռնությամբ և «Հայ զբոսավարների գիլդիա»-ի աջակցությամբ մայրաքաղաքում մեկնարկել է «Ես եմ իմ քաղաքի զբոսավարը» ծրագիրը, որով զբոսաշրջության ոլորտում սովորող և ոլորտով հետաքրքրվող երիտասարդները կանցնեն մեկամսյա վերապատրաստման դասընթացներ, կծանոթանան զբոսավարի մասնագիտությանը, կայցելեն Երևանի մի շարք թանգարաններ, կստանան Երևանի պատմության և մշակույթի վերաբերյալ համապատասխան գիտելիքներ, որպես կամավորներ կաշխատեն զբոսաշրջային հետաքրքրություն ներկայացնող վայրերում ու կաջակցեն մայրաքաղաք այցելող հյուրերին:

Ողջունելով ներկաներին՝ Երևանի քաղաքապետի օգնական, տուրիզմի ոլորտը համակարգող Մարիա Բարաղամյանը շնորհավորել է մասնակիցներին և շնորհակալություն հայտնել ծրագրի հանդեպ ցուցաբերած հետաքրքրության համար:
«Երևանի քաղաքապետարանի տուրիզմի բաժինը տևական ժամանակ աշխատել է ծրագրի մշակման շուրջ և արդեն այսօր պաշտոնապես մեկնարկում է այն: Ծրագիրը նախատեսում ենք դարձնել ամենամյա և, ըստ էության, այս տարվա մասնակիցները լինելու են ծրագրի առաջամարտիկները, դեսպանները, ովքեր ներկայացնելու են Երևանը և հաղորդակցվելու են մեր քաղաքի հյուրերի հետ: Հաշվի առնելով, որ այս տարին թե՛ մեր հանրապետության և թե՛ մայրաքաղաքի համար պատմական ու հոբելյանական տարի է, որպես ծրագրի մասնակիցներ, դուք հնարավորություն կունենաք ներգրավվելու և մաս կազմելու Երևանի հիմնադրման 2800-ամյակին նվիրված, ինչպես նաև մի շարք այլ միջոցառումների ու փառատոների: «Ես եմ իմ քաղաքի զբոսավարը» ծրագիրը կարևոր հարթակ է այն երիտասարդների համար, ովքեր ընտրել են զբոսավարի մասնագիտությունը և ցանկանում են որպես կամավոր դառնալ քաղաքային միջոցառումների մասնակիցը: Մեր նպատակն է նաև երիտասարդներին կանոնակարգված մատուցել Երևանի վերաբերյալ զբոսաշրջային տեղեկատվությունը», - ընդգծել է Մարիա Բարաղամյանը: 
Ավելի քան 150 դիմորդներից ընտրվել է շուրջ 40 մասնակից, ովքեր տիրապետում են օտար լեզուների և պատրաստ են կամավոր հիմունքներով օժանդակել Երևանի վերաբերյալ ճշգրիտ տեղեկատվության տարածմանը: «Ես եմ իմ քաղաքի զբոսավարը» ծրագրի մասնակիցները համապատասխան մասնագետների կողմից կստանան անհրաժեշտ գիտելիքներ և հմտություններ: 
Ի դեպ, երեքշաբաթյա դասընթացները վարելու են «Հայ զբոսավարների գիլդիա»-ի նախագահ Լիա Բախշինյանը, ինչպես նաև Երևանի Վ. Բրուսովի անվան լեզվահասարակագիտական համալսարանի «Միջազգային տուրիզմ» կենտրոնի տնօրեն Մարինե Հայրապետյանը, Հայկական տուրիզմի ինստիտուտի ռեկտոր Ռոբերտ Մինասյանը, ԻԿՕՄ-Հայկական թանգարանների ազգային կոմիտեի նախագահ Անի Ավագյանը, «Էրեբունի» պատմահնագիտական արգելոց-թանգարանի տնօրեն Գագիկ Գյուրջյանը, Ալ. Թամանյանի անվան Հայաստանի ճարտարապետության ազգային թանգարանի տնօրեն Անուշ Տեր-Մինասյանը, Երևան քաղաքի պատմության թանգարանի տնօրեն Արմինե Սարգսյանը և թանգարանի էքսկուրսիայի բաժնի վարիչ Մարինա Խաչմանուկյանը:
«Առաջին անգամ անցկացվող այս նախաձեռնությունն իր տեսակով բացառիկ է, ինչի համար պետք է առանձնահատուկ շնորհակալություն հայտնել տուրիզմի բաժնին: Դասընթացների ընթացքում դուք կստանաք ոչ միայն Երևանի վերաբերյալ պատմական կարևոր տեղեկատվություն, այլև կտիրապետեք զբոսավարի աշխատանքի հիմնական գործիքներին: Ուրախ եմ, որ երիտասարդներն այսքան հետաքրքրված են զբոսաշրջության ոլորտով: Մեզ սպասում են հետաքրքիր և բովանդակալից դասաժամեր», - նշել է «Հայ զբոսավարների գիլդիա»-ի նախագահ Լիա Բախշինյանը: 
Ընդգծելով նախաձեռնության կարևորությունը՝ Երևան քաղաքի պատմության թանգարանի տնօրեն Արմինե Սարգսյանն էլ նկատել է, որ երիտասարդների համար այն իսկապես լավ հնարավորություն է զարգացնելու իրենց գիտելիքներն ու հմտությունները:
«Երևանի զբոսաշրջության մասին խոսելիս առաջին հերթին պետք է լավագույնս տիրապետել և ներկայացնել մայրաքաղաքի հարուստ պատմությունը, հատկապես, որ այս տարի նշում ենք հինադրման 2800-ամյակը: Այս առումով՝ Երևանի պատմության թանգարանը պատրաստ է լինելու ձեր կողքին և հնարավորին աջակցելու: Ամենակարևորը, թերևս, սերն է Երևանի և ընտրած մասնագիտության հանդեպ, որն էլ կապահովի ցանկալի արդյունքներ: Համոզված եմ, որ ծրագիրը հաջողելու է և լինելու է շարունակական» ,-նկատել է Արմինե Սարգսյանը: 
Ծրագրի մասնակիցներին են փոխանցվել մայրաքաղաքի զբոսաշրջության վերաբերյալ տեղեկատվական նյութեր: Այնուհետ մասնակիցներն առաջին այցը կատարել են Երևանի պատմության թանգարան և ծանոթացել ցուցանմուշներին, ստացել զբոսաշրջային հետաքրքրություն ներկայացնող տեղեկատվություն: