Ծաղկաձորում 20-ամյա ամերիկահայն ամենագնացը վարել է ոչ շատ արագ. մանրամասներ

Ծաղկաձորում օգոստոսի 1-ին Համահայկական ամառային 6-րդ խաղերին մասնակցելու նպատակով  ԱՄՆ–ից Հայաստան ժամանած 20-ամյա Լեւոն Շանթի Թոմազի՝ ամենագնացով վթարի ենթարկվելու դեպքի առթիվ հարուցվել է քրեական գործ: Այս մասին հայտնում են Քննչական կոմիտեի մամուլի ծառայությունից:

Նրանց փոխանցմամբ՝ օգոստոսի 1-ին՝ ժամը 15։00-16։00-ի սահմաններում, ամերիկահայ Լեւոն Շանթի Թոմազը Ծաղկաձորի ճոպանուղու 2-րդ կայանի մոտակայքում, Թեղենիս լեռան տարածքում, հողապատ եւ խոտածածկ ճանապարհին, վարել է «Յամահա» մակնիշի ամենագնացը, ինչը կողաշրջվել է՝ առաջացնելով Լ.Թոմազի մահը։

Դեպքի առթիվ նույն օրը հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասի հատկանիշներով (Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ):  Կատարվել է դեպքի վայրի եւ տրանսպորտային միջոցի՝ ամենագնացի զննություն:

Որոշում է կայացվել Լ. Թոմազին տուժող ճանաչելու մասին, նշանակվել է դատաբժշկական փորձաքննություն։

Պարզվել է, որ Լեւոն Թոմազը ԱՄՆ Գլենդել  քաղաքի համանուն ֆուտբոլային ակումբի անդամ է, որն ակումբի անդամների հետ Հայաստան է ժամանել 2015թ. օգոստոսի 1-ին՝ համահայկական խաղերին մասնակցելու նպատակով։ Նույն օրն ակումբի մի քանի անդամներ մեկնել են Ծաղկաձոր շրջագայելու, նստել են ճոպանուղի, ապա նաեւ վարել ամենագնաց։

Նախաքննության ընթացքում հարցաքննվել են մի շարք անձինք, նրանց թվում՝ Լ.Թոմազի ընկերները, վթարի պահին նույն ամենագնացի մյուս ուղեւորը։ Ականատես վկաների ցուցմունքների համաձայն՝ սարից իջնելու ժամանակ ամենագնացը վարել է տուժողը՝ ոչ շատ արագ։ Ճանապարհին ամենագնացի հետեւի մասն անսպասելի վերեւ է բարձրացել, որի հետեւանքով ուղեւորը վրայից ընկել է առաջ, ամենագնացը կողաշրջվել է, իսկ Լ.Թոմազը՝ հայտնվել ամենագնացի տակ։

Քննություն է տարվում՝ պարզելու վթարի պատճառները, ձեռնարկվում են անհրաժեխտ միջոցներ՝ դեպքի բազմակողմանի եւ լրիվ հետազոտումն ապահովելու ուղղությամբ:

Աղբյուրը՝ NEWS.am