Կառավարության անցած նիստի օրակարգի հարցերից երեքը ներկայացրել էր «Օրենսդրության կարգավորման ազգային կենտրոնը»

Վաչագան Գևորգյանը ֆեյսբուքյան իր էջում գրում է .

Կառավարության անցած նիստի օրակարգի հարցերից երեքը ներկայացրել էր «Օրենսդրության կարգավորման ազգային կենտրոնը»: Առաջինն օրենսդրական նախաձեռնություն էր, որով առաջարկվում է «Հայաստանի Հանրապետությունում տոհմային անասնաբուծության մասին» ՀՀ օրենքում ամրագրել, որ ՀՀ կառավարությունը սահմանում է տոհմանյութի` տեսակից կախված հավաստագրման ժամկետները, նաև սահմանել, որ երկրում օգտագործվող տոհմանյութը հավաստագրվում է կամավոր հիմունքով:

ՀՀ տոհմային անասնաբուծության օրենսդրության համաձայն Հայաստանում արտադրվող և օգտագործվող տոհմանյութը ենթակա է պարտադիր հավաստագրման: Հավաստագրման նպատակը տոհմանյութի արտադրության և օգտագործման, ինչպես նաև դրա վաճառքի գործընթացի արդյունավետ կազմակերպումն է, ինչը կխթաներ գյուղատնտեսական կենդանիների և թռչունների ցեղերի կատարելագործումը, արհեստական սերմնավորման արդյունավետ կիրառումը, նախիրների, հոտերի, երամակների վերարտադրության բարելավումը:

Այժմ երկրում գործում են մեկ տասնյակից ավելի տավարաբուծական և այլ կենդանիների բուծմամբ զբաղվող տոհմային տնտեսություններ, որոնք ոչ միայն բուծում են կենդանիներ, այլ նաև զբաղվում են տոհմանյութի արտադրությամբ ու վաճառքով: Հավաստագիրը, որը տոհմային կենդանու ծագումը, մթերատվությունը և այլ որակական ցուցանիշները, ինչպես նաև սաղմի կամ սերմնահեղուկի որակը հավաստող փաստաթուղթ է, տրվում է ֆիզիկական և իրավաբանական անձանց, որոնք զբաղվում են տոհմային կենդանիների բուծմամբ և տոհմանյութի արտադրությամբ:

Հավաստագիրը հաստատում է, որ տոհմանյութն արտադրված է տոհմային կենդանիների մաքրացեղ բուծման արդյունքում ստացված կենդանիներից, որոնք բոնիտավորման տվյալներով ճանաչվել են մաքրացեղ և օգտագործման են երաշխավորվել հոտի /նախրի, երամակի, պարսի/ վերարտադրության և տոհմանյութի արտադրության համար: Տոհմանյութի հավաստագրումը տնտեսվարողին անհրաժեշտ է իր ապրանքը ներքին շուկայում որակյալ ներկայացնելու և թանկ վաճառելու համար: Իսկ երբ տոհմանյութն արտադրվում է սեփական սպառման համար, ապա այն դառնում է ավելորդ պահանջ: Ուստի հավաստագրի պարտադիր լինելը հիմնավորված չէ: Առաջարկվող օրենսդրական կարգավորումը քաղաքացիների և տնտեսվարող սուբյեկտների համար առաջարկում է տոհմանյութի հավաստագրման կամավոր սկզբունք և դրա տեսակով պայմանավորված հավաստագրման ժամկետներ. դրա շնորհիվ կնվազի տվյալ սուբյեկտների կատարած ծախսը:

Օրենքի նախագիծը սահմանված կարգով կներկայացվի ՀՀ Ազգային ժողով: Հաջորդ որոշմամբ ուժը կորցրած է ճանաչվել կառավարության նախկին որոշումներից հինգը և հստակեցվել են հարկային ոլորտում դործող մի շարք կարգավորումներ: Երրորդ որոշմամբ հստակեցվել են ՀՀ էկոնոմիկայի նախարարության աշխատակազմի մտավոր սեփականության գործակալության բողոքարկման խորհրդի` բողոքների քննարկման կարգի մի շարք դրույթներ, որոնց գործադրմամբ կհստակեցվեն կոնկրետ գործողությունների կատարման ժամկետները, կկրճատվեն տնտեսվարողների ծախսերը: Գործարար միջավայրի բարելավմանն ուղղված այս հերթական որոշումներից հետո վարչապետ Հովիկ Աբրահամյանը «Օրենսդրության կարգավորման ազգային կենտրոն» պետական հիմնարկի տնօրեն Արմեն Եղիազարյանին հանձնարարել է կառավարության հաջորդ նիստում հանրագումարի բերել վերջին մեկուկես տարում կենտրոնի կատարած աշխատանքը և դրա արդյունավետությունը: