3 օր ա՝ ջերմությունս 39,4 ա, չի իջնում. մահացած ծննդկանի վերջին խոսակցությունն ընկերուհու հետ (լուսանկարներ)

NEWS.am-ը գրում է.

«Շենգավիթ» բժշկական կենտրոնից հուլիսի 27-ին «Էրեբունի» ԲԿ տեղափոխված եւ երկու օր անց մահացած 26-ամյա ծննդկան Մերի Մարգարյանի ջերմությունը մի քանի օր 39,4-ից չի իջել: Այս մասինNEWS.am-ի թղթակցին ասաց մահացած ծննդկանի ընկերուհին՝ Աննա Մինասյանը, որը հուլիսի 25-ին զրուցել էր Մերիի հետ:

«Մերիի հետ հուլիսի 20-ին պետք է հանդիպեինք, բայց չստացվեց: Մերին ասաց, որ բժշկի է գնացել եւ ասել են, թե լարվածություն կա, հանգիստ է պետք: Դրա համար հանդիպումը հետաձգվեց: Ամսի 25-ին երեկոյան Viber-ով խոսեցինք, ասաց, որ վատ է զգում, ջերմությունը 39,4 է, պարացետամոլ է խմում, իջնում է, հետո նորից բարձրանում: Բժիշկն էլ ասել է՝ շատ հեղուկ օգտագործիր, 4-րդ օրվանից ջերմությունդ կիջնի, վիրուսը կանցնի»,- ասաց Աննա Մինասյանը:

Աննան Մերիին ճանաչում էր 4 տարի, միասին աշխատել էին Երեւանի դեղատներից մեկում: Աննայի պատմելով՝ դեպքից 10 օր առաջ Մերին սկսել էր պատրաստվել փոքրիկի ծնվելուն:

«Մերին այնպիսի մարդ էր, որ իր հոգատարությամբ, լավ տրամադրությամբ դուր էր գալիս բոլորիս: Հետո մեր մոտից դուրս եկավ, բայց կապը մեզ հետ պահում էր: 10 օր առաջ էլ եկել էր՝ երեխայի համար պարագաներ գնելու»,- ասաց Աննա Մինասյանը:

Աննա Մինասյանը NEWS.am-ին տրամադրել է նաեւ նրանց վերջին խոսակցության «սքրինշոթը», որը ներկայացնում ենք ստորեւ՝

Հիշեցնենք, որ Մերի Մարգարյանի հարազատները կատարվածի մեջ մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին, ում մոտ էլ հաշվառված է եղել եւ 35 շաբաթ հետազոտվել է 26-ամյա կինը: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: Մերիի վիճակը ծայրահեղ ծանր է եղել, 2 օր անց նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը: