Մահացած 26-ամյա ծննդկանի բժշկուհին՝ Շուշանիկ Բախշյանը, անհետացել է

NEWS.am-ը գրում է.

«Շենգավիթ» բժշկական կենտրոնի բժշկուհի Շուշանիկ Բախշյանը, որին 26-ամյա ծննդկան Մերի Մարգարյանի հարազատները մեղադրում են վերջինիս մահվան մեջ, անհետացել է:

NEWS.am-ի տեղեկություններով՝ Մերի Մարգարյանի մահվանից հետո Շուշանիկ Բախշյանն աշխատանքի չի գնում, հեռախոսազանգերի չի պատասխանում, նույնիսկ ֆեյսբուքյան էջն է փակել:

Մեզ հաջողվել է պարզել նաեւ, որ Շուշանիկ Բախշյանն օրերս ոստիկանություն է դիմել՝ խնդրելով պաշտպանել իր անվտանգությունը:

Նշենք, որ ըստ տարբեր տեղեկությունների՝ Շուշանիկ Բախշյանը հայտնի գործարարի կին է:

Հիշեցնենք, որ Մերի Մարգարյանի հարազատները կատարվածի մեջ  մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին, ում մոտ էլ հաշվառված է եղել եւ 35 շաբաթ հետազոտվել է 26-ամյա կինը: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: Մերիի վիճակը ծայրահեղ ծանր է եղել, 2 օր անց նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը:

Հարազատների խոսքով՝ Մերի Մարգարյանի մոտ «Էրեբունի» ԲԿ-ում հայտնաբերվել է երկկողմանի թոքաբորբ: