Շատ բուռն էին զգացողություններս, երբ մեքենան մեր բակում տեսա. Լիլի Սարգսյանը բացահայտում է, թե ով է իրեն մեքենա նվիրել

Life.panorama.am-ը գրում է.

«Միսս Արմենիա 2017» Լիլի Սարգսյանը երեկ իր Instagram-ի էջում մեքենայի լուսանկար էր տեղադրել` մակագրելով «Շնորհակալ եմ»: Գեղեցկուհու այս քայլից հետո անմիջապես տարատեսակ ասեկոսեներ տարածվեցին: Մինչ շատերը Լիլիի նվերը վերագրում էին նրա հնարավոր սիրելիին կամ երկրպագուին, Life.panorama.am-ը կապ հաստատեց նրա հետ եւ տեղեկացավ, թե նվերն իրականում ում կողմից է:

«Մեքենան իմ ամանորյա նվերն է` հայրիկիս կողմից: Պետք է խոստովանեմ, որ թեեւ հայրս անընդհատ հետաքրքրվում էր, թե ինչ մակնիշի մեքենա եմ սիրում, սակայն նվերն իսկապես ինձ համար անակնկալ էր: Շատ բուռն էին զգացողություններս, երբ մեքենան մեր բակում տեսա: Հայրս ասաց դուրս արի բակ, իսկ արդեն դրսում հասկացա, որ իմ Ձմեռ պապը Ամանորից մի քանի օր շուտ է նվերս ուղարկել: Հայրս գիտեր, որ շատ եմ սիրում թե այս մակնիշը, թե սեւ գույնը»,- ժպիտով պատմեց Լիլին:

Հարցին, թե տարատեսակ ասեկոսեները ի՞նչ անդրադարձ են ունեցել նրա վրա, պատասխանեց.

«Այո, շատերը երեկվանից սկսեցին խոսել, հարցեր բարձրացնել, թե ում նվերն էր այդ շքեղ մեքնենան, սակայն պետք է ասեմ, որ մեքենան իրականում այնքան էլ շքեղ չէ, այն շատ թանկարժեք չէ, իսկ այ ապագայում ինքս աշխատելով` ինձ համար շքեղ մեքենա կգնեմ»:

Լիլի Սարգսյանը դեռեւս չափահաս չէ, ուստի վարորդական իրավունք չունի:

«Իմ 18 տարեկանը դեռ չի լրացել, մայիսին չափահաս կդառնամ եւ վարորդական իրավունք ձեռք կբերեմ, իսկ մինչ այդ վարել կսովորեմ: Ամեն ինչ կանեմ, որպեսզի օրինավոր վարորդ դառնամ»,- ժպիտով ավարտեց նա:

Հեղինակ` Անուշիկ Մելքոնյան