Սոնա Շահգելդյանն առաջարկում է իր բաղադրատոմսը ամանորյա սեղանի համար

Life.panorama.am-ը գրում է.

 

Ինչպես նախորդ տարի, այս տարի եւս Life.panorama.am-ը կներկայացնի հայ աստղերի առաջարկած բաղադրատոմսերը ամանորյա սեղանների համար:

 

Երգչուհի Սոնա Շահգելդյանը մեզ հետ զրույցում նախ նշեց, որ չնայած իր զբաղվածությանը՝ սիրում է ժամանակ անցկացնել խոհանոցում, համեղ ուտեստներ պատրաստել ընտանիքի եւ հյուրերի համար:

 

Երգչուհին նկատեց նաեւ, որ թեեւ ամանորյա սեղանները հարուստ են մսատեսակներով պատրաստված ուտեստներով, սակայն նա դրանց նախապատվություն չի տալիս եւ գոնե աղցանների հարցում փորձում է խուսափել մսից:

«Ես խոզի միս առհասարակ չեմ օգտագործում, միայն տավարի եւ գառի միս եմ ուտում, բայց առավել շատ բանջարեղեն եւ ձկնամթերք եմ սիրում: Միս չսիրելու պատճառը կենդանիների հանդեպ չափազնց մեծ հոգատարությունն է»,- նշեց նա:

Սոնա Շահգելդյանը առաջարկեց ամանորին պատրաստել «Ծովախեցգետնով աղցան», որի բաղադրատոմսը ներկայացնում ենք ստորեւ:

 

 

«Վերցնում ենք երկու տուփ ծովախեցգետին, մեկ գլուխ սոխ, մեկ տարա պահածոյացված եգիպտացորեն, կես բաժակ երկար բրինձ, թթու վարունգ, կամ թթու կաղամբ, սամիթ, թթվասեր եւ մայոնեզ, աղ ու սեւ բիբար:

 

Ծովախեցգետինը խորանարդաձեւ կտրատում ենք, ապա մանրացնում ենք սոխը, հետո ավելցնում եգիպտցորենը եւ թթու վարունգը: Լվանալուց հետո փոքր-ինչ շոգեխաշում ենք երկար բրինձը, այնքան, որ չփխլվի, ու ավելացնում մեր զանգվածին: Վերջում համեմունքներ ու սամիթ ենք լցնում, իսկ մատուցելուց ավելացնում թթվասերն ու մայոնեզը: Շատ գեղեցիկ է, երբ այս աղցանը զարդարում ենք ձիթապտղով: Վստահեցնում եմ՝ շատ համեղ է ու կարեւորը ծանրամարս չէ»:

 

Հետաքրքրվելով, թե երգչուհին կարեւորություն տալի՞ս է ամանորյա ճոխ սեղաններին, պատասխանեց.

«Անկեղծ ասաց, այնքան էլ կարեւորություն չեմ տալիս դրանց: Ինձ համար ոչ թե ճոխությունն է  կարեւոր, այլ ուտեստների համեղ լինելը: Նախընտրում եմ համահունչ կերակրատեսակներ պատրաստել, որոնք չեն վնասի մեր առողջությանը»:

 

Ի դեպ՝ Սոնա Շահգելդյանը նկատեց, որ իրենց տանը Ամանորին ավանդական ուտեստներ են պատրաստվում.

«Սիրում եմ, երբ որոշ ավանդույթներ պահպանվում են: Օրինակ՝ տատիկս շատ համեղ նրբաբլիթ եւ Իշլի քյուֆթա է պատրաստում: Սիրում եմ, երբ սեղանը գեղեցիկ է զարդարված լինում: Դեռ այն ժամանակ, երբ ամուսնացած չէի եւ մայրիկիս հետ էի ապրում, դարձյալ ինքս էի զարդարում տոնական սեղանը, հիմա առավել եւս միայնակ եմ այդ ամենը անում արդեն իմ տանը: Գիտեք, այս ամենը Ամանորի մի մասն է կազմում, բայց ինձ համար կարեւոր է ոչ թե սեղանը, այլ, որ ուրախ դիմավորես Նոր տարին, տարիդ սկսես առանց հիասթափությունների: Շնորհավորում եմ բոլորիս գալիք Ամանորն ու Սուրբ Ծնունդը, եւ մաղթում եմ, որպեսզի ամենակարեւորը խաղաղության եւ առողջության տարի լինի 2018-ը»,- ավարտեց երգչուհին: