Հեռանկարային ծրագիր գյուղատնտեսության ոլորտում

Մարինա Ներսեսյանը ֆեյսբուքյան իր էջում գրում է .

Հայաստանի տնտեսության հիմնական շարժիչ ուժը գյուղատնտեսության ոլորտն է, ուստի այն պետք է լինի պետության առաջնային ուշադրության կենտրոնում:

Երեկ Արարատի մարզի Փոքր Վեդի համայնքում բացվել է գյուղատնտեսական սպասարկման կենտրոն: Այն հիմնադրվել է ՀՀ գյուղատնտեսության նախարարության աջակցությամբ Ագրոբիզնեսի և գյուղի զարգացման կենտրոն (CARD) հիմնադրամի կողմից ԱՄՆ ՄԶԳ (USAID) ֆինանսավորմամբ իրականացվող «Գործընկերություն՝ հանուն գյուղական համայնքների բարգավաճման» ծրագրի շրջանակում:

Պետք է նշենք, որ կենտրոնը տեղի գյուղատնտեսներին տրամադրելու է ծառայությունների ամբողջական փաթեթներ, կապեր է ստեղծելու գյուղատնտեսների և միջազգային կազմակերպությունների միջև, որոնք տրամադրում են պարագաներ, սարքավորումներ, ինչպես նաև տեղեկատվություն այգեգործության կառավարման զարգացման նոր տեխնոլոգիաների մասին:
Բացի դա կենտրոնը հագեցած է լինելու հողի, ջրի և բույսերի հետազոտության ժամանակակից լաբորատոր սարքավորումներով, ինչպես նաև նպաստելու է շուկայական կապերի հաստատմանը և հասանելի է դարձնելու ֆինանսական ռեսուրսները Հայաստանի ֆերմերների ու գյուղական ՓՄՁ-ների համար:

Գյուղատնտեսական սպասարկման կենտրոնում տեղի և օտարերկրյա մասնագետների կողմից կազմակերպվելու են սեմինարներ և դասընթացներ՝ Արարատի մարզի շուրջ 25 համայնքների մոտ 2 500 գյուղատնտեսների համար: Կենտրոնը ծառայելու է նաև որպես գործնական սեմինարների անցկացման վայր Հայաստանի ազգային ագրարային համալսարանի ուսանողների համար:

Նմանատիպ կենտրոններ նախատեսվում է հիմնել Հայաստանի բոլոր մարզերում: 
Հիշեցնենք, որ մայիս ամսին գյուղատնտեսական սպասարկման կենտրոն է հիմնվել Արմավիրի մարզի Նորապատ համայնքում: