«Ես իմ արածը արեցի». Քյավառցին «կլյուչով» ջախջախել է կնոջ գլուխը

http://www.1in.am

Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ ավարտվել է Կամո Ս.-ի գործի քննությունը:

Նախաքննական մարմինը 48 –ամյա Կամո Ս.-ին մեղադրանք էր առաջադրել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:

Տուժողը Կամոյի կինն էր:

Ստացիոնար դատահոգեբուժական փորձաքննության եզրակացությամբ՝ Կամո Ս.-ն հանցավոր արարքը կատարել է հիվանդագին խանգարված վիճակում՝ ցնորազառանցական ապրումների ազդեցության տակ: Կամո Ս.-ն ճանաչվել է անմեղսունակ:

Դատարանը քննել է նրա նկատմամբ բժշկական բնույթի հարկադրանքի միջոց կիրառելու հարցը:

Ըստ սպանությունից հետո առաջադրված մեղադրանքի՝ 2017 թվականի մայիսի 7-ին, գիշերվա ժամը 3-ի սահմաններում Կամո Ս.-ն իրենց ննջասենյակում «մեքենաների ընթացամասերի նորոգման համար նախատեսված բանալիով»՝ «կլյուչով», իր կին Նինել Ս.-ի գլխին բազմաթիվ հարվածներ է հասցրել ու սպանել է:

Նախաքննության ընթացքում Կամո Ս.-ն իրեն մեղավոր է ճանաչել: Նա հայտնել է, թե դեպքի օրն ինքն ու կինը պառկած են եղել ննջասենյակում: Ինքը վեր է կացել, իջել է նկուղ, վերցրել է «կլյուչը», վերադարձել է ննջասենյակ: Կինը անկողնում պառկած էր: Չգիտի՝ քնած էր, թե՝ ոչ: Ինքը աջ ձեռքում եղած «կլյուչով» միանգամից հարվածել է կնոջ գլխին: Քանի անգամ է հարվածել՝ չի հիշում: Տանը միայն իրենց հարսն էր, նա քնած էր կողքի ննջասենյակում, բայց չի լսել ու չի միջամտել:

Տուժողի իրավահաջորդը՝ սպանված կնոջ մայրը, հայտնել է, որ դստերը վերջին անգամ տեսել է մայիսի 4-ին՝ Նինելն իրենց տուն էր եկել Կամոյի հետ:

Դեպքի օրը՝ մայիսի 7-ին, ինքն արթնացել է առավոտյան ժամը 6-ին, զբաղվել է տան գործերով: Իր որդին տուն է եկել ու, թաքցնելով ճշմարտությունը, ասել է՝ գնանք Նինելի տուն, Կամոն Նինելին ծեծել է: Երբ գնացել են, իմացել է, որ գիշերվա ժամը 3-ին Կամոն անկողնում պառկած Նինելի գլխին հարվածներ է հասցրել «կլյուչով» ու սպանել է: Ինքը տեղյակ է եղել, որ Կամոն 2014 թվականից հաշվառված է հոգեկան առողջության կենտրոնում:

Սպանված Նինելի եղբայրը հայտնել է, որ գիշերն իրեն զանգել է եղբոր որդին ու ասել է՝ շտապ դուրս արի, գնում ենք Նինելի տուն: Գնացել են: Նկատել է, որ Կամոյի մեքենան, որը միշտ բակում էր լինում, այնտեղ չէր: Տան մուտքի դուռը բաց էր: Մտել են ներս, տեսել են, որ հյուրասենյակի լույսը վառած է: Նինելի ու Կամոյի ննջասենյակի լույսը վառած չէր, դուռն էլ կիսաբաց էր:

Ինքը բացել է ննջասենյակի դուռը, հյուրասենյակի լույսն ընկել է այնտեղ, ու իրենք տեսել են՝ ննջասենյակի մահճակալին կողքի վրա պառկած է Նինելը, նրա դեմքի շրջանը ամբողջովին արյունոտ էր: Անմիջապես զանգահարել են ոստիկանություն:

Եղբոր տղան արթնացրել է Նինելի հարսին, ով քնած էր ու՝ կատարվածից անտեղյակ:

Ինքը գիտեր, որ Կամոն հոգեկան հիվանդություն ունի: Իմացել է, որ սպանությունից հետո Կամոն մեքենայով հեռացել է տանից, կամովին ներկայացել է ոստիկանության Մարտունու բաժին:

Նինելի ու Կամոյի որդին հայտնել է, որ 2017 թվականի ապրիլին եղբոր հետ մեկնել է ՌԴ՝ արտագնա աշխատանքի: Ծնողների հետ մշտապես խոսել է հեռախոսով: Հոր հետ վերջին անգամ խոսել է մայիսի 6-ին: Դրանից հետո գիշերը՝ ժամը 2-ի սահմաններում, հայրը զանգել է իրեն ու ասել է. «Ես իմ արածը արեցի»: Բայց նա չի ասել, թե ինչ է արել: Ինքն անմիջապես հաղորդագրություն է ուղարկել քեռու տղային ու ասել է, որ մյուս քեռու հետ գնա իրենց տուն: Քիչ անց հայրը նորից է զանգել իրեն ու ասել է, թե իր արածն արել է, ցանկացել է տունն էլ վառել, բայց խղճացել է հարսին ու չի վառել:

Այդ օրվա երեկոյան ինքը հորեղբոր ու եղբոր հետ վերադարձել է իրենց գյուղ և իմացել է, որ հայրը սպանել է մորը: Հայրը հոգեկան հիվանդություն ուներ, խանդի պատճառով անհարկի վիճում էր մոր հետ, ծեծում էր նրան…

Նինելի ու Կամոյի հարսը, որ նրանց հետ նույն տանն էր ապրում ու դեպքի պահին իր ննջասենյակում քնած էր, հայտնել է, որ գիտեր՝ Կամոն հոգեկան հիվանդություն ունի: Նինելն իրեն ասում էր, թե Կամոն նյարդերի հետ կապված խնդիրներ ունի, եթե իր վրա թեկուզ՝ անտեղի բարկանա, ինքն ուշադրություն չդարձնի, միշտ իր կողքին լինի…

Մայիսի 6-ի երեկոյան Նինելն ու Կամոն չեն վիճել օրվա ընթացքում: Բարձր տրամադրություն ունեին: Երեկոյան ինքը խոսել է Ռուսաստանում աշխատող ամուսնու հետ: Կեսգիշերին իր սենյակից լսել է, որ Կամոն դուրս եկավ ննջարանից, միացրեց հյուրասենյակում գտնվող հեռուստացույցը: Մոտ հիսուն րոպե անց նա անջատել է հեռուստացույցը ու գնացել է ննջարան: Ինքը քնել ու այլևս ոչինչ չի լսել: Իրեն արթնացրել է սկեսուրի եղբոր տղան ու ասել է, որ Նինելը մահացել է: Ինքն այդ պահին չի իմացել՝ ինչից է նա մահացել: Գիշերը ինքը Նինելի ննջարանից աղմուկ, վիճաբանություն չի լսել…

Դեպքի վայրի զննության արձանագրության մեջ նշված է, որ սպանված կնոջ դիակի կողքին գցած էր հանցագործության գործիքը՝ արյունոտ «կլյուչը», որի վրա ներկած մազեր կային կպած…

Դատարանը որոշել է Կամո Ս.-ին ազատել քրեական պատասխանատվությունից ու պատժից: Նրա նկատմամբ կիրառվել է բժշկական բնույթի հարկադրանքի միջոց՝ հարկադիր բուժում՝ հոգեբուժական հիվանդանոցի հատուկ տիպի հոգեբուժական բաժանմունքում:

Այս թեմայով Հայրը սպանել է 18-ամյա դստեր նախկին ընկերոջը՝ համացանցում տեսնելով նրանց ինտիմ տեսանյութը. ԶԳՈՒՇԱՑՈՒՄ՝ խիստ մուտքը միայն մեծահասկների համար Քաղաքի հենց կենտրոնում սպանել են ամենահեղինակավոր օրենքով գողին. Սարսափելի կադրեր 40-ամյա կինն սպանել է իր նորածնին