Ներդրում բերելու «մաստեր կլաս»՝ Սերժ Սարգսյանից

Ռիա Նովոստիին տված հարցազրույցում Սերժ Սարգսյանը նշել է, որ նոյեմբերի 13-ին կհայտարարվի շուրջ մեկ միլիարդ դոլարի ներդրումային ծրագրի մասին։ Սարգսյանը նշել է նաև, որ հիմնական ներդրւմներն ուղղվելու են էներգետիկայի ոլորտին։ ներդրւմներն իրականացվելւ են ֆրանսիական հայտնի Շնայդեր Էլեկտրիկ  (Schneider Electric) ընկերության հետ համագործակցությամբ։  Շնայդեր էլեկտրիկը զբաղվում է արևային և քամւ էներերգիայի արտադրությամբ, կորպորատիվ և սոցիալական ծրագրերի, մասնագետների համար կրթական ծրագրերի իրականացմամբ և այլն։ Հարցազրույցում Սարգսյանը նշել է նաև, թե Երևանն ու Մոսկվան աշխատում են համատեղ ներդրումային հիմնադրամի ստեղծման վրա, որի միջոցները կարող են ուղղվել այդ թվում նաև ՏՏ ոլորտի և էներգետիկայի ոլորտում նախագծերի ֆինանսավորման համար:

Հաշվի առնելով այն փաստը, որ նոյեմբերի 13-ը սարերի ետևում չէ, պետք է արձանագրենք, որ արդեն իսկ մենք կարող ենք խոսել ռեալ ներդրումների մասին։ Այս հայտարարությունը սակայն կարող ենք գնահատել որպես ծանր և իրական հարված մեկ այլ ներդրումների մասին խոստումներին։ Խոսքը վերաբերում է դեռևս խորհրդարանական ընտրություններիրի շրջանից սկսած վարչապետ Կարեն Կարապետյանի 850 միլիոնի ներդրումների խոստմանը։ Այս խոստման իրականացման համար, թերևս հիշում ենք՝ ստեղծվեց այսպես կոչված ներդրղների ակումբը, որի բերած ներդրումներին հայաստանյան հասարակությունը շարունակում է սպասել։ Սակայն ինչպես եզրակացնում ենք Սերժ Սարգսյանի խոսքից,  ներդրղների ակումբն արդեն իսկ երկրորդ պլան է մղվում ՝ քանի որ Մոսկվան և Երևանը, ինչպես նշում է նախագահը, քննարկում են ներդրումային հիմնադրամի ստեղծումը։

Անշուշտ, կհնչեն կարծիքներ, որ ներդրումային համատեղ հիմնադրամն ու ներդրողների ակումբը տարբեր իրողություններ են և չեն հակասում միմյանց, սակայն կարծես թե պարզ է, որ նման հիմնադրամի անհրաժեշտություն չէր զգացվի, եթե վարչապետի նախաձեռնած ներդրողների ակումբը գործեր նպատակային։

Սակայն սա էլ մի կողմ։ Վերադառնանք Շնայդեր էլելտրիկին։ Վերջինիս պատվիրակությունը՝ ընկերության Ռուսաստանի և ԱՊՀ երկրների գծով տնօրեն Յոհան Վանդերպլաետսենի գլխավորությամբ Հայաստանում էր դեռևս 2016 թվականի օգոստոսին։ Վանդերպլաետսենը հանդիպում ունեցավ նաև վարչապետ Հովիկ Աբրահամյանի հետ, շնորհակալություն հայտնեց հրավերի համար և նշեց, որ ընկերությունը կատարել է ուսումնասիրություններ և պատրաստ է ներդրւմներ իրականացնել Հայաստանի էներգետիկ համակարգում։ Այսինքն այստեղից հասկանալի է, որ այն ներդրումային ծրագիրը, որն առկա է ներկայումս սեղանին, բանակցված և համաձայնեցված իրողություն է, որն ունի նախապատմություն և զարգացման ընթացք։

Այլ կերպ ասած մենք գործ ունենք ոչ թե ներդրումների վերաբերյալ հերթական խոստման հետ, այլ ռեալ ծրագրի։  Հետաքրքիր է նաև այս ծրագրի թվային արժեքը՝ 1 միլիարդ դոլար, որը կարծե թե համեմատական է վարչապետի խոստացած 850 միլիոնի հետ և այստեղ ակամայից հարց է ծագում՝ արդյոք Սերժ Սարգսյանը ներդրում բերելու մաստեր կլաս է ցույց տալիս Կարեն Կարապետյանին թե ոչ։ Ինչ խոսք, մենք չենք համարձակվի խարխլել Հանրապետականի կուռ շարքերն ու մտնել մատի ու մատանու կամ Սերժ Սարգսյանի և Կարեն Կարապետյանի արանքը, բայց մյուս կողմից միթե տարօրինակ չէ, երբ մեծ ծավալի ներդրւմների մասին խոսում է վարչապետը, իսկ ներդրումները գալիս են բլորովին այլ աղբյուրից և այլ միջնորդավորմամբ։

Դե, իսկ եթե այնուամենայանիվ այստեղ որևէ հակասություն չկա, քավ լիցի, մենք մեծ ուրախությամբ կշարունակենք սպասել և 850 միլիոն ներդրման։

Ա․Մարգարյան