Հյուսիսային հողմի տրակտատ

Ընդամենը մոտ մի տարի առաջ բարձրաստիճան պաշտոնյաներից մեկի ինքնագոհ տիկինը հայաստանյան համացանցի հավերժական աստղն էր։ Օր չկար, որ այս կամ այն կայքը գրեթե ծաղրանքով չանդրադառնար այս տիկնոջ և նրա բարձրաստիճան ամուսնու ֆոտոսեսիաներին, որոնք գուցե գեղեցիկ ընտանեկան ֆոտոներ էին, սակայն փոքր ինչ տարօրինակ։ Ինչև սա մի կողմ, մի կողմ նաև այն, նույն այս հայաստանյան մեդիան հավերժ ծիծաղի առիթ ուներ սույն տիկինոջ գրառումների և նկարների գոյությամբ։ Սակայն խնդիրն այստեղ տիկինը չէ, այլ հենց մեդիա կամ լրատվամիջոցներ կոչվածը։

 Պարզվում է, որ հայաստանյան անսկզբունք, անլուրջ ու գրչակ մեդիան կամ մեդիաները պատրաստ են սույն տիկնոջը դարձնել ազգի հերթական դավաճանին  բացահայտող ու դիմակազերծող հերոսի։ Իսկ դավաճանն էլ աստված գիտի թե ով է, ի վերջո անուններ չկան, կան միայն աշնանային անձրևոտ օրերի ցուրտ զեփյուռն ու գույնզգույն տերևների մեղմ ու մրսած սոսափյունը։

Այս սոսափյունից մեր սրտերը ճմլվում են, զգում ենք մի խորը անձկություն և նվաղում զինապարտության մասին օրենք բառերը կարդալիս։ Օհ, միթե հեշտագին տարկետումն այլևս չի լինելու և չեն լինելու 25 տարեկանում գիտությունների թեկնածու դարձած ընդդիմադիր, պաշտոնյան ու պատգամավոր հրաշամանուկներ։ Որն էր արդյոք այս արհավիրքի պատճառը։

Ցավոք մենք  այդպես էլ կմնանք անհայտության քառուղիներում դեգերելիս և չենք հասկանա, թե ինչպես հեղինակավոր մի շարք լրատվամիջոցներ և նույնիսկ կարկառուն գործիչներ, վերածվեցին ընդամենը մի տիկնոջ սրտի նվաղքի կարդիոգրամայի։ Միթե տիկինն ատամնաբույժին հատուկ հմտությամբ հաշվել էր մեդիայի ատամները, թե այնուամենայնիվ աշնանային մեղմ զեփյուռը բոլորովին էլ այն չէր, ինչ թվում էր առաջին սարսուռից, այլ իրականում հյուսիսից եկած ցրտաշունչ հողմի սլաքներից էր՝ համեմված իջևանյան խոնավ օդի և խորը աշնան ելևէջներով։ Գուցե սա էր պատճառը, ու տիկնոջ աշնանային տրակտատում լսելի էին դառնում հույժ գեղեցկադեմ ու անբասրելի մի երիտասարդի կատարմամբ հնչող ռազմի թմբուկների հետզհետե խլացող զարկերը։

Ա․ Մարգարյան