Կլիմայական խնդիրների լուծմանն ուղղված Կլիմաթոն Երևան առաջին հաքաթոնը՝ Երևանի քաղաքապետարանում

Հոկտեմբերի 27-ին՝ ժամը 16:00-ից, Երևանի քաղաքապետարանի ճեմասրահում կմեկնարկի կլիմայական խնդիրների լուծմանն ուղղված #ԿլիմաթոնԵրևան առաջին հաքաթոնը:

Երևանի քաղաքապետարանի աջակցությամբ «Կայուն Էներգիայի Զարգացման Հիմնադրամի» կողմից անցկացվող միջոցառման նպատակն է մշակել նորարար և օպտիմալ լուծումներ` բարելավելու մայրաքաղաքի բնապահպանական և էներգետիկ կառավարումը, որոնց վերջնական նպատակը քաղաքի օդի մաքրմանը նպաստելն է: Ծրագրին մասնակցում են ավելի քան 40 ծրագրավորման և տվյալների վերլուծության մեջ հմուտ երիտասարդներ, ինժեներներ, երիտասարդ գիտնականներ և նորարարներ, բիզնես մտածողություն ունեցող կրեատիվ մարդիկ:

Հաքաթոնի սկզբում փորձագետները կներկայացնեն քաղաքի էներգետիկ կառավարման, բնապահպանական և կլիմայական մարտահրավերները և լուծումների հիմնական ուղղությունները: Այնուհետև մասնակիցները թիմերի կբաժանվեն և լուծումներ կմշակեն:

Հարկ է նշել, որ Կլիմաթոնը կլիմայական մարտահրավերների մասին գլոբալ հաքաթոն է, որը նույն օրը միաժամանակ անցկացվում է աշխարհի 230 քաղաքներում: Յուրաքանչյուր քաղաք հաստատում է կլիմայական իր մարտահրավերը, այնուհետև 24 ժամվա ընթացքում մասնակիցները մշակում են այդ մարտահրավերի հետ կապված լուծումներ: Լավագույնները հնարավորություն են ստանում զարգացնելու իրենց գաղափարներն ու դրանք կիրառելու քաղաքում: