«Ոտքի Հայաստանը» վաղը անակնկալներ է խոստանում

Էլեկտրաէներգիայի թանկացման որոշումը չեղարկել պահանջող «Ոտքի Հայաստան» շարժումը վաղը նոր մարտավարությամբ կսկսի գործել՝ անակնկալ մատուցելով ոստիկաններին եւ իշխանություններին: Այս մասին այսօր՝ հուլիսի 29–ին, Երեւանի փոխոստիկանապետ Վալերի Օսիպյանին ասաց Հանրապետության հրապարակում արդեն երրորդ օրը շարունակվող նստացույցի կազմակերպիչներից Դավիթ Սանասարյանը։

Օսիպյանն ու Սանասարյանը բանավիճեցին, երբ փոխոստիկանապետը հերթական անգամ հայտարարեց, որ նստացույցն արտոնված չէ, իսկ ցուցարարների գործողությունները` անօրինական եւ անկազմակերպ։

«Տեսնում ենք էլի՝ ինչ եք կազմակերպել: Էս չի՞ ձեր կազմակերպածը: Եթե կազմակերպում եք, նորմալ կազմակերպեք»,- Դավիթ Սանասարյանին դիմեց փոխոստիկանապետը, ինչին նա պատասխանեց. «Վաղը կտեսնեք մեր կազմակերպածը, վաղը բոլորի համար անակնկալ ունենք»:

NEWS.am-ի հետ զրույցում Դավիթ Սանասարյանը նշեց, որ անակնկալը տեղի կունենա վաղը երեկոյան, նա այլ մանրամասներ չհայտնեց:

NEWS.am-ի թղթակիցը հաղորդում է, որ այս պահին Հանրապետության հրապարակում մոտ 50 ցուցարար է մասնակցում արդեն երրորդ օրն անցկացվող նստացույցին: Նրանք բաժանվել են երկու խմբի՝ հավաքվելով գորգի տարբեր կողմերում: Հանրապետության հրապարակում  մեծ թվով ոստիկաններ կան, որոնք հսկում են հետիոտնային անցումները, պատ կազմած հսկում են ոչ միայն ցուցարարներին, այլեւ Կառավարության շենքը:

Աղբյուրը՝ NEWS.am