Գարեգին Բ-ն մեկնել է Բեռլին. նա կհանդիպի Գերմանիայի նախագահին

Գարեգին Բ Ամենայն Հայոց Կաթողիկոսն այսօր՝ հոկտեմբերի 17-ին, 5-օրյա այցով մեկնել է Բեռլին (Գերմանիային Դաշնային Հանրապետություն)` Արեւելյան Ուղղափառ Եկեղեցիների պետերի հետ մասնակցելու Եվրոպայում Ռեֆորմացիայի 500-ամյա հոբելյանի հիշատակության շրջանակներում անցկացվող պաշտոնական միջոցառումներին:

Մայր աթոռի տեղեկատվական համակարգից NEWS.am-ին հայտնում են, որ այցի շրջանակներում նախատեսվում է Նորին Սրբության եւ Արեւելյան Ուղղափառ եկեղեցապետերի հանդիպումը ԳԴՀ նախագահ Ֆրանկ-Վալտեր Շտայնմայերի, ինչպես նաեւ հանդիպում Գերմանիայի հայոց թեմի Բեռլինի հայ համայնքի հետ:

Վեհափառ Հայրապետն օրհնության խոսքով հանդես է գալու նաեւ «Մերձավոր Արեւելքի քրիստոնյաները» միջազգային գիտաժողովի բացմանը:

Արեւելյան Ուղղափառ Եկեղեցիների հովվապետերի նախագահությամբ հոկտեմբերի 21-ին Բեռլինի Մայր Տաճարում տեղի է ունենալու միջեկեղեցական աղոթք` Մերձավոր Արեւելքում խաղաղության հաստատման ու պահպանման համար:

Նորին Սրբությանն ուղեկցող պատվիրակության կազմում են Դամասկոսի Հայոց թեմի առաջնորդ Գերաշնորհ Տ. Արմաշ եպիսկոպոս Նալբադյանը, Մայր Աթոռ Սուրբ Էջմիածնի Միջեկեղեցական հարաբերությունների բաժնի պատասխանատու Հոգեշնորհ Տ. Շահե ծայրագույն վարդապետ Անանյանը, Հառիճի Թրբանճյան ընծայարանի տեսուչ Հոգեշնորհ Տ. Ղեւոնդ աբեղա Սաղաթելյանը որպես Նորին Սրբության գավազանակիր, Մայր Աթոռ Սուրբ Էջմիածնի Սոցիալական ծառայության բաժնի տնօրեն Արժանապատիվ Տ. Մարկոս քահանա Մանգասարյանը եւ Մայր Աթոռի Իրավաբանական-խորհրդատվական հանձնախմբի անդամ,  ի. գ. թ. Թամարա Շաքարյանը: