Մամուլից ազատվելու օր

Մամուլի ազատության օրն է: Լալահառաչ հարցազրույցներ, հայտարարություններ, խմբագիրների խորը մտահոգություններ՝ թե գիտեք, Հայաստանում խոսքի ազատությունը վտանգված է: Ով է վտանգել, ինչպես է վտանգել, չի ասվում: Չի ասվում նաև, թե ինչպես հանկարծ մամուլը վերածվեց փող աշխատող քարոզչամեքենայի, գումար կամ ֆինանս չէ, ուղղակի փող: Թե ինչպես դաշտում հայտնվեցին անսահման ազատությունից օգտվող վայ լրագրիստներ ում խմբագրիստներ, ովքեր հրաշալի մի մեխանիզմ են մտածել՝ ցեծոտել սրան կամ նրան, հետո փող պահանջել իրենց իսկ ցեխը մաքրելու համար:

Ինչևէ, մամուլի ազատության օրն է, համենայնդեպս ասում են: Սակայն միգուցե ավելի լավ է մի օր էլ որոշենք մամուլից ազատ լինելու համար: Այն մամուլից, որտեղ Ջիգարխանյանի ընտանեկան կոնֆլիկտները, կամ հնարավոր փոթորկի մասին պաշտոնական տեղեկատվական հաղորդագրությունը շատ ավելի լայնորեն է լուսաբանվում ու քննարկվում, քան թե երկրի ու հասարակության համար կարևորագույն խնդիրները: Ըստ այսօրվա մամուլի, շատ ավելի կարևոր է ամենայան հավանականությամբ ծերունական փսիխոզով տառապող Ջիգարխանյանի հաղորդումը կնոջ մասին, քան թե ԱԺ ամբիոնից Բնապահպանության նախարարի գրեթե ուղղակի հաղորդումը հանղագործության մասին: Հանցագործության, որը կատարվել է երկրի ու երկրի բնության նկատմամբ:  Կամ ասենք նույն այսօրվա մամուլին հետևելով, կարող ենք պարզել, որ շատ ավելի առանցքային ու կարևոր են Գագիկ Սուրենյանի ու ոչ միայն նրա ֆեյսբուքյան գրառումները, քան վարչապետի խոստացած ներդրումների բացակայությունը, մթերքների թանկացումը, այն փաստը, որ հաջորդ տարի կրճատվել են կրթությանն ու առողջպահությանն ուղղված բյուջետային հատկացումները:

Սրանք անկարևոր բաներ են, բացի այդ պղտորում են բարետես վարչապետի փրկչական իմիջը: Անկարևոր է նաև այն, որ տարվա սկզբից բանկերը նվազեցրել են բիզնեսի վարկավորումը, և սա այն դեպքում, երբ ամեն աստծո օր մենք լսում են ճոռոմագոչ հայտարարություններ երկրի տնտսությունը ոտքի հանելու,  ակտիվացնելու, դոմփելու ու զարկ տալու մասին:  Վարչապետի պիջակի գույնը ըստ մամուլի շատ ավելի կարևոր է քան նրա հանձնարարականների բովանդակությունը: Մի խոսքով հենց այսպիսի մամուլի ազատություն ու մամուլ:

Եվ այս ամենը տեսնելուց հետո արդյոք ուզում եք խոսել մամուլի կամ խոսքի ազատությունից: Կարծում ենք դժվար թե, ավելի շատ ցանկություն է առաջանում ազատվել մամուլից:

Ա.Մ.