29-ամյա տղամարդը Կոմայգում գայթակղել է անչափահաս երեխային, տարել է «Ժեմչուգ» բար և խլել նրա Iphone 7-ը

1in.аm-ը գրում է

Կենտրոն և Նորք-Մարաշ վարչական շրջանների ընդհանուր իրավասության դատարանում նշանակված դատական նիստերին ազատության մեջ գտնվող ամբաստանյալը սկսել է չներկայանալ: Նրա գրանցման հասցե՝ Սարի թաղ են գնացել ոստիկանները: Նրանց ստացած տեղեկությամբ՝ Գևորգը 15 տարի նշված հասցեում չի բնակվում…

Գևորգի նկատմամբ հայտարարվել է հետախուզում, նրա խափանման միջոցը փոփոխվել, ընտրվել է կալանավորումը:

2017 թվականի հունիսի 7-ին Գևորգը հայտնաբերվել ու տեղափոխվել է ՔԿՀ: Քրեական գործի վարույթը վերսկսվել, Գևորգի նկատմամբ հայտարարված հետախուզումը դադարեցվել է:

Դատական նիստի ժամանակ անչափահաս տուժողն ու նրա օրինական ներկայացուցիչը հայտարարել են, թե հաշտվում են Գևորգի հետ, միայն ցանկանում են, որ Գևորգը իրենց այդ վերաբերմունքի համար շնորհակալ լինի իրենցից:

Գևորգն իր երախտագիտությունն է հայտնել անչափահաս տուժողին ու նրա օրինական ներկայացուցչին, հայտնել է, որ ինքն էլ է ցանկանում հաշտվել նրանց հետ, պատրաստ է հատուցել տղային պատճառած նյութական վնասը՝ առաջին իսկ հնարավորության դեպքում:

Քանի որ գործը մասնավոր մեղադրանքի գործ էր, դատարանը որոշել է կարճել քրեական գործի վարույթը և դադարեցնել Գևորգ Այվազյանի նկատմամբ քրեական հետապնդումը՝ տուժողի հետ հաշտության հիմքով:

Միևնույն ժամանակ, դատարանը առանց քննության է թողել տուժող կողմի հայցը՝ 485 հազար դրամի պահանջի վերաբերյալ՝ հնարավորություն տալով այդ պահանջը ներկայացնելու քաղաքացիական դատավարության կարգով:

Գևորգ Այվազյանի նկատմամբ ընտրված խափանման միջոց կալանավորումը վերացվել է, նա ազատ է արձակվել դատարանի դահլիճում:

Պետք է ասել, որ Կոմայգում անչափահաս տղային 2016 թվականի նոյեմբերի 23-ին գայթակղելուց, «Ժեմչուգ» բար տանելուց և թանկ «Այֆոնը» հափշտակելուց ոչ շատ առաջ Գևորգ Այվազյանը արդեն իսկ գտնվել էր անազատության մեջ՝ նա պատիժ էր կրել իր նախորդ խարդախության համար:

Սարիթաղցի Գևորգ Այվազյանին հանդիպել էի Երևանի Մալաթիա-Սեբաստիա վարչական շրջանների ընդհանուր իրավասության դատարանում: Նա ամբաստանյալի կարգավիճակ ուներ, իսկ տուժողը ոչ թե Կոմայգու ներկայացուցիչ էր, այլ կին էր, ում վստահությունը Գևորգը չարաշահել էր «Օդնոկլասնիկի» կայքով:

Ըստ մեղադրանքի՝ այն ժամանակ 26-ամյա Գևորգ Այվազյանը 2014 թվականի մարտի 13-ին «Օդնոկլասնիկի» կայքի միջոցով ծանոթացել է Լոռու մարզի բնակչուհի Շողիկի (անունը փոխված է) հետ: Չարաշահել է նրա վստահությունը, խաբել ու մարտի 18-ից մինչև ապրիլի 5-ը խարդախությամբ հափշտակել է Շողիկի 1 միլիոն 573 հազար դրամը:

Գևորգ Այվազյանին մեղադրանք էր առաջադրված խարդախության համար՝ ՀՀ քրեական օրենսգրքի 178 հոդվածի 2-րդ մասի 2-րդ կետով:

Ըստ տուժող կնոջ՝ Գևորգը «Օդնոկլասնիկի» կայքում ծանոթանալով իր հետ՝ ներկայացել է որպես Ֆրանսիայից ամուսնանալու նպատակով Երևան ժամանած հայ մեծահարուստ:

Գևորգը նորածանոթ կնոջը ներկայացրել է, թե Ֆրանսիայում բրենդային հագուստի խանութներ ունի և շատ հարուստ է: Շողիկի գլուխը պիտի որ չպտտվեր Ֆրանսիայից Երևան ամուսնանալու եկած մեծահարուստի խոսքուզրույցից, քանզի նա արդեն ամուսնացած էր և ոչ միայն իր ամուսնու կինն էր, այլև՝ երկու երեխաների մայրը:

Բայց Շողիկը կորցրել է իրականության զգացողությունը:

Գևորգի կողմից արված սիրո խոստովանություններն այդ կինն ընդունել է հալած յուղի տեղ, ու ծանոթության արդեն հինգերորդ օրը պատրաստ է եղել հանուն Գևորգի դատարկել իր ընտանիքի «գրպանը»:

Ըստ Գևորգի ներկայացրածի՝ նրա բանկային քարտերը Հայաստանում «բացվելու էին» ապրիլի 8-ին: Իսկ մինչ այդ՝ Գևորգը պետք է որոշ ֆինանսական հարցեր լուծեր, սակայն կանխիկ դրամ չուներ:

Ամենասրտառուչ և Շողիկի աչքերից արցունք քամած խնդրանքն այն էր, որ Գևորգը իր սիրասուն մոր գերեզմանը պիտի կառուցեր, որպեսզի հասցներ հարսնացուի հետ մեկնել Ֆրանսիա: Մոր գերեզմանը կառուցելը սուրբ գործ է, Շողիկը անձնազոհաբար նետվել է Գևորգին օգնելու…

Շողիկի ամսական աշխատավարձը 50 հազար դրամ է եղել: Ու նա ամուսնուց թաքուն գրավ է դրել իր ոսկեղենը, գումարը Գևորգի ասած եղանակով՝ իր քաղաքից Երևան ուղևորվող տաքսիստների միջոցով ուղարկել է Գևորգին:

Մեկանգամյա «օգնությամբ» Գևորգի խնդրանքները չեն ավարտվել: Նա երկու-երեք օրը մեկ Շողիկից գումարներ խնդրելու նորանոր պատճառներ է բերել, որոնք հիմնավոր են թվացել Շողիկին, ու կինը մեկը մյուսի հետևից կատարել է Գևորգի խնդրանքները: Նրան փող ուղարկելու համար ուրիշներից էլ է պարտքեր արել, նույնիսկ բանկերից վարկ է վերցրել, ներկայումս այդ պարտքերի, վարկերի ու տոկոսների տակ է հայտնվել:

Շողիկը Գևորգին ուղարկել է ընդամենը… 1 միլիոն 355 հազար դրամ: Հետագայում քաղհայցի պահանջ է ներկայացրել 1 միլիոն 573 հազար դրամի՝ հաշվելով նաև տաքսիների վրա ծախսած գումարները, տոկոսները և կատարած մյուս ծախսերը՝ գումարներն իր քաղաքից Գևորգին հասցնելու համար:

Դատարանում Շողիկն ասել է, թե Գևորգն իր հետ մտերմիկ զրույցներ է վարել, ասել է, թե անչափ հավանել է, շահել է իր վստահությունը: Ինքը հավատացել է նրա երդումներին: Գևորգն ասել է՝ մոր գերեզմանը սարքելուց հետո վերցրածի եռապատիկը, քառապատիկը կվերադարձնի, իսկ Շողիկն ասել է՝ պետք չէ, միայն իմ տվածը վերադարձրու: Ու Գևորգը երդվել է, թե բոլոր գումարները մեկտեղ կվերադարձնի ապրիլի 8-ին՝ անձամբ կգա Շողիկի քաղաք ու կհայտնի իր խորին շնորհակալությունը:

Շողիկը դատարանում ասել է, թե նախկինում «Օդնոկլասնիկի» կայքով ոչ մեկի հետ չէր ծանոթացել, միայն խաղեր էր խաղում: Գևորգը եղել է նրա առաջին համացանցային ծանոթը…

Շողիկը ապրիլի ութին սրտատրոփ սպասել է Գևորգի հայտնվելուն կամ գոնե գումարների վերադարձին: Բայց ո՛չ մեկն է տեղի ունեցել, ո՛չ էլ մյուսը: Հաջորդ օրը ևս Գևորգից ոչ մի տեղեկություն չի ստացվել:

Ապրիլի տասին Շողիկը ստիպված է եղել ամեն բան խոստովանել ամուսնուն:

Վերջինս, Շողիկի ասելով, խիստ զայրացել ու կնոջը տնից վռնդել է: Շողիկը վարձով է ապրել: Այդ ընթացքում Գևորգը համացանցային ասպարեզում թեթևակի երևացել է, փորձել է պատճառաբանել, թե «չի կորել», թե ինչ-որ անհեթեթ պատճառով իրեն «բռնել են», «հետապնդել են» և այլ արդարացումներ է բերել: Բայց արդեն ուշ էր:

Շողիկն արդեն դիմել էր իրավապահներին…

Տուժող կինը հայտնել է, որ ամուսինը հանուն երեխաների՝ հաշտվել է իր հետ, իրենք նորից միասին են, ընտանիքը վերականգնվել է:

Կատարվածի մասին կինն ասել է. «Դե, ստացվել ա, խաբվել եմ, տվել եմ՝ ի՞նչ անեմ, միայն պնդում եմ իմ քաղհայցը, ուրիշ՝ ոչինչ… Եթե իմ գումարը վերադարձնի, թող դատարանը մեղմ վարվի նրա հետ, եթե ոչ՝ ոչ…»:

Գևորգը հայտարարել է. «Ես երդվացել եմ, որ կվերադարձնեմ ու չեմ հրաժարվում…»:

Մալաթիա-Սեբաստիա վարչական շրջանի ընդհանուր իրավասության դատարանը Գևորգ Այվազյանին մեղավոր է ճանաչել ու դատապարտել 2 տարի 3 ամիս ազատազրկման: Հօգուտ տուժող Շողիկի՝ նրանից պետք է բռնագանձվի պատճառած վնասը՝ 1 միլիոն 573 հազար դրամ:

Այս դատավճռի կայացումից երեք ամիս անց վերաքննիչ քրեական դատարանը բավարարել է Գևորգ Այվազյանի վերաքննիչ բողոքը՝ պատիժը մեղմացնելու առումով: Դատարանը 3 ամսով մեղմացրել է նշանակված պատիժը ու Գևորգ Այվազյանին դատապարտել է 2 տարի ազատազրկման: Պատժի սկիզբը՝ 2014 թվականի օգոստոսի 18-ից: Վերաքննիչ դատարանը միաժամանակ արձանագրել է, որ Գևորգը ոչ մի քայլ չի կատարել տուժողին պատճառած վնասը հատուցելու ուղղությամբ…