Սիրելի քաղաքացիներ, ուզում եք էժան միս՝ քիչ կերեք

ՀՀ կառավարության գերատեսչությունների ղեկավարները, իսկ ավելի պարզ ասած նախարարները կարծես թե որոշել են մեկը մյուսին հերթ չտալով մաքսիմալ աբսուրդ հայտարարություններ անել։ Այս անգամ հերթը գյուղատնտեսության նախարարինն է։ Փաստոեն նախարար Առաքելյանի կարծիքով հայաստանյան շուկայում միսը, կարագն ու կաթնամթերքն ընդհանրապես թանկանում է շուկայում պահանջարկի մեծացման պատճառով։

Այսինքն սա նշանակում է, աճել է նշված սննդամթերքների պահանջարկը։ Թե ինչի հաշվին է աճել, ինչու է աճել, այդպես էլ պարզ չի դառնում, գուցե Հայաստանի բնակչությունն արդեն իսկ հասել է 4 միլիոնի և պետք չէ սպասել մինչ 2040 թվականը, կամ գուցե վարչապետի խոստացած 850 միլիոն ներդրումն է տեղ հասել ու երկրի ազգաբնակչության սոցիալական դրությունը կտրւկ լավացել է, դե մթերքներն էլ թանկացել, ոչինչ։ Համենայնդեպս որևէ այլ պատասխան հնարավոր չէ գտնել, բացի թվարկվածներից։ Դե ինչ խոսք, այստեղ պատճառ չեն կարող հանդիսանալ տարվա երաշտը, որի արդյունքում անասնակերի գինը հասել է «էէէ եսիմ ուր», որ նույն անասնակերի գնի պատճառով հարկադիր մորթ է իրականացվում, ինչն էլ բերում է կաթնամթերքի գնի թանկացման որ էլի հազար ու մի պատճառ կա, որի մասին կարող են խոսել մասնագետները։

Բայց դե ինչ կարիք կա այսքան խորանալ, այսքան հանգամանորեն անդրադառնալ ամեն ինչին, ինչ պարտադիր է ուղղակի հասարակության հետ պարզ ու անկեղծ խոսել, չէ որ ընդամենը կարելի է ասել, ՝ դե շուկա է, իսկ շուկայում ցանկացած գին ինքնակարգավորվում է։ Այստեղ մեզ մնում է արձագանքել թևավոր դարձած արտահայտությամբ՝ «Իյաա, ի՞րոք»։

Աշոտ Բագրատյան