Այսօր հեպատիտների համաշխարհային օրն է

Վրեժ Հովսեփյանը ֆեյսբուքյան իր էջում գրում է.

Ամեն տարի հուլիսի 28-ը շատ երկրներում նշվում է որպես հեպատիտի դեմ պայքարի համաշխարհային օր:

ԼՂՀ առողջապահության նախարարության մամլո ծառայության փոխանցմամբ՝ առողջության համաշխարհային կազմակերպությունը աշխարհի տարբեր երկրների բժիշկներին խորհուրդ է տալիս այս օրը իրազեկման արշավներ անցկացնել՝ մարդկանց պատմելով հեպատիտի և դրա արդյունքում առաջացող հիվանդությունների մասին:
Քիչ կարևոր չեն նաև կանխարգելիչ միջոցառումները` ախտորոշում իրականացնելը, հեպատիտ B-ի դեմ պատվաստումներ կատարելը և այլն: Հեպատիտի վիրուսները համարվում են մարդկության առողջությանը սպառնացող հիմնական գործոններից: Առողջության համաշխարհային կազմակերպության տվյալներով, հեպատիտն ամբողջ աշխարհում վարակել է մոտ 2 միլիարդ մարդ, այսինքն` մոլորակի վրա բնակվող ամեն երրորդ բնակչին:

Որոշ երկրներում վիրուսային հեպատիտ A-ով վարակվել է բնակչության մեծ մասը, իսկ բնակչության տասներորդ մասը հեպատիտ B և C վիրուսների կրողներ են:Հեպատիտ են անվանում լյարդի հյուսվածքների բորբոքումը: Առանձնացնում են վիրուսային հեպատիտը. այն լյարդի բջիջներում բազմանալուն ընդունակ վիրուսն է հարուցում:

Տարբեր վիրուսներով հարուցված հեպատիտները տարբեր ձևերով են փոխանցվում, սակայն նրանք բոլորն էլ կարող են լյարդի սուր և քրոնիկ բորբոքում առաջացնել, որը հաճախ հանգեցնում է ցիռոզի և քաղցկեղի: Լեռնային Ղարաբաղի Հանրապետության տարածքում 2007 թվականից սկսած ի շնորհիվ իրականացվելիք կանխարգելիչ սանիտարահիգիենիկ և հակահամաճարակային միջոցների վիրուսային հեպատիտ A դեպքեր չեն գրանցվում: Մեր տարածքում 10 տարուց ավել է ինչ գրանցվում է հեպատիտ B և C-ի հիվանդության դեպքեր:

Վերջին 5 տարվա ընթացքում նկատվում է վիրուսային հեպատիտ B և C հիվանդությունների աճ: Հեպատիտ B և C հիվանդություններով կարելի է վարակվել հետևյալ ճանապարհով՝ չախտահանված բժշկական գործիքների միջոցով:

-Վարակված արյան կամ արյան բաղադրամասերի փոխներարկմամբ:

-Ուրիշի եղունգների հարդարման կամ սափրվելու պարագաները, ատամի խոզանակներն օգտագործելիս:

-Պիրսինգի կամ դաջվածքի պարագաների միջոցով:

-Սեռական ճանապարհով՝ վարակված անձի հետ կենակցելիս:

-Վարակված մորից երեխային՝ ծննդաբերության ընթացքում: Լեռնային Ղարաբաղի Հանրապետությունում երեխաները պատվաստվում են հեպատիտ B հիվանդության դեմ համաձայն պատվաստման օրացույցի, իսկ ռիսկի խմբի բուժաշխատողները յուրաքանչյուր 7 տարին մեկ ենթարկվում են վիրուսային հեպատիտ B-ի դեմ կանխարգելիչ պատվաստման: Ներկա դրությամբ հեպատիտ C-ի դեմ պատվաստանյութ չկա, սակայն հեպատիտ C հիվանդությունը ենթակա է բուժման համապատասխան հակավիրուսային դեղամիջոցներով: Քրոնիկ հեպատիտներով հիվանդները գտնվում են դիսպանսեր հսկողության տակ և ստանում են համապատասխան բուժում:

Վիրուսային հեպատիտների արյան լաբորատոր հետազոտությունները՝ վիրուսային հակամարմինների որոշում (հակա-HCV), իրականացվում է Լեռնային Ղարաբաղի Հանրապետության առողջապահության նախարարության պետական հիգիենիկ և հակահամաճարակային տեսչության «Համաճարակաբանության և հիգիենայի կենտրոն» պետական ոչ առևտրային կազմակերպության և «Հանրապետական բժշկական կենտրոն» փակ բաժնետիրական ընկերության կողմից:

Լեռնային Ղարաբաղի Հանրապետության առողջապահության նախարարությունը բնակիչներին իրազեկում է վիրուսային հեպատիտների վտանգի մասին: Եղեք զգոն ամենափոքր կասկածների դեպքում դիմեք բժշկի: