«Շատ արդարացված է, որ շատերը գերադասում են մեկնել արտերկիր հանգստանալու». Լուիզա Ղամբարյան

News.am-ը գրում է.

Ամռան սեզոնն ասոցացվում է հանգստի հետ, երբ բոլորը շտապում են հավաքել ճամպրուկներն ու մեկնել հանգստանալու: Հետաքրքիր է իմանալ, թե հայտնիներն ինչպե՞ս են անցկացնում իրենց ամառային արձակուրդը: NEWS.am STYLE-ի զրուցակիցն այս անգամ դերասանուհի Լուիզա Ղամբարյանն է:

Մեզ հետ զրույցում Լուիզան ասաց, որ դեռ չի մեկնել հանգստի, քանի որ աշխատում է, խաղում է ներկայացումներում, իսկ հանգստի պատրաստվում է գնալ օգոստոս ամսին:

Դերասանուհին ամուսնու եւ դստեր հետ մեկնելու է Հունաստան: «Ինձ մոտ հանգիստը միշտ ընտանիքիս հետ է: Չենք եղել Հունաստանում դեռ, այդ իսկ պատճառով ընտրեցինք հենց այդ երկիրը: Կարծում եմ` պետք է որ լավ լինի: Ծովափնյա հանգստին զուգահեռ` կփորձենք նաեւ այցելել այնտեղի տեսարժան վայրերը, միգուցե նաեւ գնանք Աթենք: Չգիտեմ, տեղում կորոշենք»,-ասաց Լուիզան:

Անդրադառնալով Հայաստանում հանգստանալու հարցին ու դրա` ոչ այդքան մատչելի գներին, դերասանուհին նշեց.

«Այստեղ խնդիրը ոչ միայն ֆինանսական է, այլեւ նախապատվության հարց է: Ես եւ ընտանիքիս բոլոր անդամները սիրում ենք ծովափնյա հանգիստ, իսկ Հայաստանում, ցավոք, այլընտրանք չկա: Հայաստանի բոլոր այն վայրերում, որտեղ հնարավոր է հանգստանալ, մենք 2-3 օրով եղել ենք, տեղեր կան, որ շատ սիրել ենք, բայց, ընդհանուր առմամբ, քանի որ մենք գերադասում են ենք ծովափնյա կլիման եւ ջրային հաճույքներըը, նախընտրում ենք տարբեր տարիներ տարբեր ծովափնյա երկրներ մեկնել:

Անշուշտ, ֆինանսական կողմն էլ  կա, որովհետեւ գաղտնիք չէ, որ Հայաստանում լավ տեղերը, որտեղ ուզում ես արժանավայել հանգիստ ունենալ, գնային իմաստով գրեթե նույնն են, ինչ դրսում նույն կարգի եւ որակի հյուրանոցները, դրան գումարած` կարելի է տեսնել ավելի հետաքրքիր վայրեր, զարգացնել մտահորիզոնը: Դրա համար, իհարկե, շատ արդարացված է, որ շատերը X գումարի սահմաններում գերադասում են մեկնել արտերկիր հանգստանալու, բայց Հայաստանում էլ կան տեղեր, որտեղ ես մեծ հաճույքով եղել եմ եւ չեմ դժգոհել»:

Զրուցեց Շուշան Շատիկյանը