Սահամանդրական փոփոխութոյւներով եկեղեցու դերը ևս մեկ անգամ կհստակեցվի

Նոր կրոնական կազմակերպությունների ի հայտ գալուն ու զարգանալուն զուգընթաց, տպավորություն է ստեղծվում, թե Հայ առաքելական եկեղեցու դիրքերը թուլանում են: Մեկ այլ անձի դավանանքի ազատության իրավունքը հարգելը կամ, այսպես կոչված, աղանդավորական կազմակերպությունների նկատմամբ հանդուրժող լինելը, երբեմն, սխալ տպավորություն է ստեղծում: Հայ պետական, մշակութային, հասարակական կյանքում Հայ եկեղեցին ունի իր ուրույն տեղն ու դերը, որքան էլ որ կրոնական կազմակերպությունները զարգանան կամ Հայ եկեղեցու ուղղությամբ քննադատություններ հնչեն:

Չցանկանալով կասկածի տակ դնել կրոնական այլ կազմակերպություններին անդամագրված անձանց հավատը առ Աստված` հարկ է նշել, որ կազմակերպությունների թիկունքում կանգնած անձանց իրական նպատակներն այդպես էլ չեն բացահայտվում: Հայտնի են դեպքեր, երբ նման կազմակերպության անդամակցելու պատճառով ընտանիքներում անհաշտություններ են լինում: Այստեղ հարկ է հիշել, որ ամուր պետության հիմքը ամուր ընտանիքն է: Հայ ընտանիքի, ինչպես նաև եկեղեցու դիրքերի թուլացումը կարող է անդրադառնալ նաև պետության անվտանգության վրա: 
Փոփոխված սահմանադրությամբ ընդգծվում է Հայ եկեղեցու դերի նշանակությունը, և միաժամանակ նշվում է, որ «ՀՀ-ն երաշխավորում է կրոնական կազմակերպությունների գոծունեության ազատությունը»: Ի դեպ, հենց հաջորդ կետում ասվում է, թե՝ «ՀՀ-ում կրոնական կազմակերպություններն անջատ են պետությունից»:

Քարոզչական մեխանիզմներ զարգացնելով, որքան հնարավոր է մեծ թվով անձանց ներգրավելով կամ ունեցվածք դիզելով, կրոնական կազմակերպությունները հազիվ թե կարողանան ստվերել Հայ առաքելական եկեղեցու դերը: Սահանադրական փոփոխությունների ընդունման դեպքում, փաստորեն, եկեղեցու դերը կրկին կհստակեցվի՝ նաև մայր օրենքով: