Գագիկ Ծառուկյանը հրաշալի օրինակ ցույց տվեց

Հայկուհի Թոքմաջյան, ֆեյսբուքյան էջ

Այս օրերին Հայաստանում անցնում է Հայաստան-Սփյուռք համաժողովը, որի ժամանակ հնչում են ելույթներ, ցանկություններ, ծրագրեր, որոնք գուցե երբևէ իրականություն չդառնան: Հայաստանի պաշտոնյաները հանդես են գալիս Սփյուռքի ներկայացուցիչներին ուղղված կոչերով` գալ Հայաստան, այստեղ ներդրումներ անել, բիզնես և աշխատատեղեր բացել և այլն:
Եվ միշտ այնպիսի տպավորություն է, որ մենք ուզվորի, խնդրողի դերում ենք, և երբևէ ինքներս մեզ հարց չենք տվել. իսկ միգուցե Սփյուռքն ինքը ունի օգնության կարիք, միգուցե սփյուռքահային պետք է նաև շահագրգռել, որպեսզի նա գա Հայաստան, իսկ այդ շահագրգռելը պետք է արվի կոնկրետ օրինակով, ոչ թե ճռճռան, բայց դատարկ խոսքերով: 
Գագիկ Ծառուկյանը հենց այդ օրինակը ցույց տվեց: Ի դեպ Ծառուկյանի ազգասեր այս քայլը ունի նաև հարուստ նախապատմություն, որն արտահայտվել էր սփյուռքահայ համայքների հետ հանդիպումների շարքով: 
Դեռ 2014 թվականին Գագիկ Ծառուկյանը այցելել էր Քուվեյթ, որտեղ բնականաբար հանդիպել էր նաև Քուվեյթի հայկական համայնքի հետ: Գագիկ Ծառուկյանը այցելել էր Քուվեյթի հայկական ազգային վարժարան, որն այսօր ունի մոտ 500 աշակերտ և Պարսից ծոցի և արաբական երկրների միակ ամենօրյա հայկական վարժարանն է: Գագիկ Ծառուկյանը այդ այցի ժամանակ վարժարանի սաներին ցուցաբերել էր լայնամասշտաբ օժանդակություն, իր չափով ներդրում ունենալով Քուվեյթում հայապահպանման նվիրական գործին: Բնականաբար, օժանդակությունից անմասն չէր մնացել նաև Քուվեյթի Սուրբ Վարդանանց եկեղեցին: 
Իրան այցի ընթացքում Գագիկ Ծառուկյանը մասնակցել էր 48-րդ Համահայկական խաղերի հանդիսավոր բացման արարողությանը, որտեղ իր կողմից 100 հազար դոլար էր հատկացրել` որպես խաղերի մրցանակային ֆոնդ: Նա նաև հանդիպել էր Թեհրանի Ազգային Առաջնորդարանի հետ և կարևորելով եկեղեցու դերը հայապահպանության կարևոր գործում` օժանդակություն էր ցուցաբերել նաև Առաջնորդարանին: Իսկ իրանահայ համայնքի հնագույն «Ալիք» օրաթերթի 85 ամյակի կապակցությամբ Գագիկ Ծառուկյանը, կարևորելով թերթի ավանդը լեզվի պահպանման և իրանահայ համայնքի կայնքի կազմակերպման և համախմբման գործում, թերթի խմբագրությանը 100 հազար դոլար էր նվիրել: Նվիրատվություններ էին եղել նաև «Արարատ» մշակութային կազմակերպությանը, իսկ իրանահայ համայնքի լավագույն մարզիկներին Գագիկ Ծառուկյանը հրավերել էր Հայաստան:
Այս տարի Լոնդոն այցի շրջանակներում Գագիկ Ծառուկյանը հանդիպել էր բրիտանահայ համայնքի հետ, որի ժամանակ խոշոր դրամական օժանդակություն էր ցուցաբերել` հայ համայնքի կենսական խնդիրները լուծելու համար: Նվիրատվություն էր եղել նաև Լոնդոնի առաջին` Սուրբ Սարգիս հայկական եկեղեցուն: 
Իսկ Լիբանանում դեռևս առաջին այցի ժամանակ Գագիկ Ծառուկյանը հանդիպել էր Մեծի Տանն Կիլիկիո Արամ Առաջին կաթողիկոսի հետ` նրա հետ համատեղ քննարկման միջոցով սիրիահայությանն օգնելու համար: Նույն այցի շրջանակներում լիբանանահայ համայնքի հետ հանդիպման ժամանակ Գագիկ Ծառուկյանը խոստացել էր, որ վճարելու է լավագույն 20 լիբանանահայ ուսանողների ուսման վարձը: Այս տարի լիբանանահայ ուսանողների արդեն երկրորդ խումբն է գալիս այդ խոստման հետքերով, թվով 18 ուսանող: 
Փաստորեն Գագիկ Ծառուկյանը մշտապես իր ուշադրության կենտրոնում է պահել սփյուռքահայ համայնքների խնդիրները և իր չափով մշտապես օգնել և օժանդակել է նրանց: Ստացվում է այնպես, որ Գագիկ Ծառուկյանը իր գործունեությամբ ցույց է տալիս, որ ոչ միայն Հայաստանը ունի Սփյուռքի օգնության և օժանդակության կարիքը, այլ նաև հակառակը: Եվ դրա ապացույցը այն ջերմ ընդունելությունն է, որին Գագիկ Ծառուկյանը արժանանում էր տեղի բոլոր հայկական համայնքներում: 
Իսկ այսօր արդեն Գագիկ Ծառուկյանի ջանքերով Հայաստան ուսման են գալիս սփյուռքահայ ուսանողներ: Հասկանալի է, որ նրանք ամենից շատն ունեն այդ օգնության կարիքը, և Գագիկ Ծառուկյանը իր օրինակով ցույց է տալիս, որ Հայաստան-Սփյուռք համագործակցությունը պետք է լինի փոխգործակցության սկզբունքով, այլ ոչ թե միակողմանի ցանկություններով և կոչերով, ինչի ականտեսն ենք մենք վաղուց: 
Հասկանալի է նաև, որ Հայաստանի կողմից մեկնած ձեռքը, ի դեմս Գագիկ Ծառուկյանի այս շնորհակալ քայլի, դեռ լուրջ պտուղներ է տալու: Եթե Սփյուռքահայը հոգածություն զգա մայր հայրենիքի կողմից, ապա ավելի լուրջ ու երկարատև ծրագրեր նրան կկապեն Հայաստանի հետ, ընդհուպ մինչև Հայաստանում ընտանիք կազմելը և այստեղ մշտական բնակություն հաստատելը: Հենց սա կարող է ներգաղթի լուրջ խթան հանդիսանալ սփյուռքահայերի համար, ու դրա հիմքը կարող է դնել Գագիկ Ծառուկյանի վերոնշյալ քայլը: 
Այսպիսով Գագիկ Ծառուկյանը արդեն երկրորդ տարին ցույց է տալիս հրաշալի օրինակ, և լավ կլիներ, որ այն վարակիչ դառնար մյուսների համար: