Երեւանում մեկնարկել է «Հայաստանի թվայնացման օրակարգ» աշխատաժողովը. ներկա է եղել վարչապետը
Ուշադրության կենտրոնում
Վարչապետ Կարեն Կարապետյանն այսօր՝ սեպտեմբերի 9-ին, ներկա է գտնվել «Հայաստանի թվայնացման օրակարգ» աշխատաժողովի բացմանը, լսել ներկայացված զեկույցներն ու փորձագիտական առաջարկությունները: Կառավարությունից NEWS.am-ին հայտնում են, որ աշխատաժողովը կազմակերպել է ՀՀ կառավարության Ռազմավարական նախաձեռնությունների կենտրոնը՝ Եվրոպական միության կողմից ֆինանսավորվող «Զարգացում եւ ռազմավարական ուսումնասիրություններ» ծրագրի օժանդակությամբ:
Աշխատաժողովի նպատակն է ազդարարել Հայաստանի թվայնացման օրակարգի մշակման մեկնարկը եւ պատրաստել օրակարգի փաստաթղթի նախագիծը՝ հաշվի առնելով հայաստանյան իրավիճակը, ներկայիս կարիքները եւ թվայնացման ոլորտում միջազգային միտումները:
Աշխատաժողովը տեւելու է երկու օր: Առաջին օրը նվիրված է լինելու թվային ռազմավարությունների միջազգային միտումներին եւ Հայաստանում դրանց կիրառման հնարավորություններին․ ներկայացվելու են տարբեր երկրների թվային ռազմավարությունները եւ այս համատեքստում՝ Հայաստանի համար քաղված դասերը: Երկրորդ օրվա ընթացքում կառավարության ներկայացուցիչները եւ փորձագետներն աշխատելու են «Հայաստանի թվայնացման օրակարգ» փաստաթղթի նախագծի վրա։ Նախատեսվում է, որ ամբողջական նախագիծը պատրաստ կլինի մինչեւ տարեվերջ:
1
2
3
4
5
1
2
3
4
5
5
