Երեւան-Սեւան ավտոճանապարհի հիմնանորոգումը կավարտվի հոկտեմբերին, գուցե ավելի շուտ. նախարարություն

ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանն այցելել է Երեւան-Սեւան մայրուղու հիմնանորոգվող տեղամասեր:

Նախարարությունից NEWS.am-ին հայտնում են, որ Երեւան-Սեւան-Իջեւան միջպետական նշանակության ավտոճանապարհի Երեւան-Սեւան ուղղությամբ 36-57-րդ կմ-ում եւ Սեւան-Երեւան ուղղությամբ 64-57-րդ կմ-ում օգոստոսի վերջին մեկնարկած շինարարությունը շարունակվում է մեծ թափով։

Նախատեսվում էր աշխատանքները սկսել հուլիսից, սակայն, նկատի ունենալով զբոսաշրջային հոսքը, մեկնարկը տրվեց օգոստոսի 28-ին։

Նախարարը զրուցել է տեխհսկիչի հետ, ճշտել, թե արդյոք պարտաճանաչ կատարվում են լաբորատոր հետազոտությունները եւ հսկվում է աշխատանքների պատշաճ իրականացումը։

Հիմնանորոգվող առաջին հատվածում աշխատում են «Ճանապարհ» ընկերության ճանապարհաշինարարները։ Հիմնականում ավարտված են ֆրեզավորման աշխատանքները, շուտով կսկսվեն հարթեցնող շերտի տեղադրման եւ ասֆալտապատման աշխատանքները։

Ինչպես այստեղ, այնպես էլ շինարարության մյուս հատվածներում երթեւեկությունը ժանանակավորապես կազմակերպված է ճանապարհահատվածի հանդիպակաց ուղղությամբ:

Նախարարը դիտարկել է նաեւ երկրորդ հատվածի շինարարությունը, որը հանձնարարված է «Կապավոր» ճանապարհաշինական ընկերությանը։ Այստեղ արդեն ավարտվել են ֆրեզավորման աշխատանքները, փռվել է հարթեցնող շերտ, որոշ հատվածներում դրվել է նաեւ ասֆալտի 5սմ-անոց շերտը։

Ճանապարհաշինարարները նշված հատվածում զուգահեռաբար նաեւ ճանապարհն են  կահավորում` տեղադրելով նոր մետաղական արգելափակոցներ։

Հիմնանորոգվող վերջին հատվածում «Սուարդի» ընկերությունն է աշխատում։ Այստեղ ընթանում են ֆրեզավորման աշխատանքները։ Նախարարը նկատել է, որ, անվտանգության չափանիշները հաշվի առնելով, Սեւան-Երեւան ուղղությամբ եւս անհրաժեշտ է փակել ճանապարհը եւ սահմանել երթեւեկության նոր կարգ։

Տեխհսկիչ Դավիթ Հովսեփյան խոսքով` աշխատանքների ընթացքը բավարար է, որոշ հատվածներում նույնիսկ գերազանց, պահպանվում են պահանջվող որակական բոլոր չափորոշիչները։

Հիմնանորոգման ծրագիրն ամբողջությամբ նախատեսված է ավարտել հոկտեմբերին, սակայն, հաշվի առնելով աշխատանքի բարձր տեմպը, կանխատեսվում է, որ շինաշխատանքները ավարտին կհասցվեն պայմանագրի ժամկետից շուտ։