Ուկրաինայի միգրացիոն ծառայությունը Կիեւում ազատ է արձակել Սահակաշվիլիի եղբորը

Վրաստանի նախկին նախագահ, Օդեսայի նախկին նահանգապետ Միխայիլ Սահակաշվիլիի եղբայրը՝ Դավիդ Սահակաշվիլին, լքել է Ուկրաինայի միգրացիոն ծառայության Կիեւում գտնվող բաժանմունքը, որտեղ նրան տեղափոխել էին բնակության իրավունքի փաստաթղթի ոչ օրինական լինելու պատճառաբանությամբ: Այս մասին դեպքի վայրից հայտնել է «112 Ուկրաինա» հեռուստաալիքի թղթակիցը:

«Նա ազատորեն լքել է միգրացիոն ծառայության շենքը եւ, պաշտպանների խոսքով, գնացել է տուն»,-հայտարարել է թղթակիցը: Նրա խոսքով, Սահակաշվիլիի փաստաբանները լրագրողներին հայտնել են, որ պարզելու են ձերբակալման պատճառները, ինչպես նաեւ մտադիր են հասնել նրան, որ քրեական գործ հարուցվի Դավիդ Սահակաշվիլիի անօրինական ձերբակալության հիմքով:

Ավելի վաղ NEWS.am-ը հայտնել էր, որ Միխայիլ Սահակաշվիլին հայտնել էր, որ Ուկրաինայի ՆԳՆ-ն Կիեւում ձերբակալել է իր եղբորը՝ Դավիդ Սահակաշվիլիին։

«Այսօր լուսաբացին Ավակովի ՆԳՆ-ի 8 ներկայացուցիչներ Կիւեում ձերբակալել են եղբորս՝ Դավիդ Սաակաշվիլիին եւ տարել անհայտ ուղղությամբ։ Նա իրավաբան է, Ուկրաինայում բնակվելու փաստաթղթեր ուներ։ Ըստ երեւույթին, փորձում են նման կերպ ինձ վրա ազդել, որպեսզի ես Ուկրաինա վերադառնամ։ Դուք ինձ շատ վատ եք ճանաչում. դա ավելի է ամրապնդում Ուկրաինան եւ ուկրաինացիներին պաշտպանելու իմ վճռականությունը»,- շաբաթ Facebook-ի իր էջում գրել էր Սահակաշվիլին։

Ուկրաինայի ներքին գործերի նախարարի նախկին խորհրդական Իլյա Կիվան «112 Ուկրաինա» հեռուստաալիքի եթերում հայտարարել էր, որ Սահակաշվիլիի եղբորն իսկապես ձերբակալել են եւ պատրաստվում են արտաքսել։