Անի Երանյանին պետք է սովորեցնեն` որոնք են գլխավոր ու երկրորդական ճանապարհները. Արման Սուլեյմանյան

Ճանապարհային ոստիկանությունը տարիներ շարունակ վաճառել է վարորդական իրավունքի վկայականները, եւ Անի Երանյանի վթարը դրա վառ ապացույցն էր: Այս մասին այսօր` հուլիսի 24-ին, լրագրողներին ասաց «Դուրս մեր գրպանից» նախաձեռնության անդամ, լրագրող Արման Սուլեյմանյանը` անդրադառնալով տեղի ունեցող ավտովթարների մեծ թվին:

«Անհարգալից վարողերին պետք է խեղդել ու տանջել դասընթացներով, նույն Անի Երանյանին պետք է ամիսներ շարունակ սովորեցնեն, թե որն է գլխավոր ու երկրորդական ճանապարհը»,- ասաց Արման Սուլեյմանյանը:

Արման Սուլեյմանյանն նշեց, որ նման բարձիթողի վիճակի պատճառն այն է, որ այսօր ՃՈ խնդիրը ոչ թե անվտանգ երթևեկություն ապահովելն է, այլ գերշահույթ ստանալը:

Հիշեցնենք, որ դերասանուհի Անի Երանյանը 2015թ. հուլիսի 18-ին իր վարած «Հունդայի» մակնիշի մեքենայով վթարի է ենթարկվել Գեղարքունիքի մարզի Ճամբարակից դեպի Սեւանի մայրուղի տանող ճանապարհին: Դերասանուհին վնասվածքներով տեղափոխվել էր Սեւանի բժշկական կենտրոն: Հիվանդանոց էր տեղափոխվել նաեւ նրա մեքենայի ուղեւորներ Հայկ Մխիթարյանը, Իզաբելա Դանիելյանը:

Ավտովթարի հետեւանքով տուժել էր նաեւ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատավոր Գագիկ Պողոսյանը, նրա կինը՝ Մարինե Կարապետյանը, նրանք եւս դիմել էին հիվանդանոց: Դեպքի առթիվ նյութեր են նախապատրաստվում:

Նշենք, որ վթարի մասնակից, դատավոր Գագիկ Պողոսյանն ավելի վաղ մեզ հետ զրույցում նշել էր, որ Անի Երանյանի դեմ բողոք չի ներկայացնելու: