Իշխանությունը չի թաքցնում՝ անհարկի ստուգումներ են իրականացվել

Արման Ղարիբյանը ֆեյսբուքյան  իր էջում գրում է.

Այսօրվա կառավարության նիստին վարչապետ Հովիկ Աբրահամյանն ասել է. «Հարգելի գործընկերներ, ուզում եմ խոսել ստուգումների կազմակերպման և անցկացման կառավարության 594-Ա որոշման մասին և նպատակահարմար եմ գտնում, որ այն վերանայվի: Ստեղծված տնտեսական իրավիճակում տնտեսվարողների գործունեության բնականոն ընթացքին անհարկի չմիջամտելու նպատակով, ինչպես նաև հաշվի առնելով տեսչական համակարգի բարեփոխումների նոր փուլի մեկնարկը, այնուհետ տեսչությունների թվաքանակի կրճատումը և դրանց արմատական վերափոխումը` hանձնարարում եմ աշխատակազմի ղեկավար-նախարար Դավիթ Հարությունյանին՝ տեսչություններ ունեցող պետական մարմինների ղեկավարների հետ քննարկել մինչև 2015 թվականի ավարտն ստուգումների կասեցման հնարավորությունը և կառավարության հաջորդ նիստին ներկայացնել առաջարկություն: Կարծում եմ՝ մենք պարտավոր ենք ականջալուր լինել տնտեսվարող սուբյեկտների դժգոհություններին, և այս իրավիճակում մենք ամեն ինչ պետք է անենք՝ բացառելու անհարկի միջամտությունները և նվազագույնի հասցնենք բոլոր կարգի ստուգումները»:

Հիշեցնենք, որ փոքր և միջին ձեռնարկատիրությամբ զբաղվող տնտեսավարող սուբյեկտների շահերը պաշտպանելու նպատակով կառավարությունը 2009 թվականին որոշում էր կայացրել (594-Ա), որը 2009 թվականի հունիսի 1-ից պետական մարմինները նախորդող տարվա արդյունքներով մինչև 70 մլն դրամ շրջանառություն ունեցած ՓՄՁ-ի մոտ ստուգումներ չեն կարող իրականացնել: Ստուգումների կասեցման արգելքը չեր վերաբերում ՀՀ կառավարությանն առընթեր պետական եկամուտների կոմիտեին և այն գերատեսչություններին, որոնց ռիսկի վրա հիմնված ստուգումների մեթոդաբանությունը և ռիսկայնությունը որոշող չափանիշների ընդհանուր նկարագիրը և ռիսկի վրա հիմնված ստուգումների ստուգաթերթերը հաստատելու մասին ՀՀ կառավարության որոշումներն ընդունվել և ուժի մեջ են մտել օրենքով սահմանված կարգով:

Նաև սահմանված է , որ ստուգում սկսելուց առաջ ստուգում իրականացնող անձը տնտեսավարող սուբյեկտի պաշտոնատար անձին ծանոթացնում է ռիսկի վրա հիմնված համակարգի էությանը, ստուգման բողոքարկման իրավունքներին և ընթացակարգերին, որի մասին տնտեսավարող սուբյեկտի պաշտոնատար անձը ստորագրում է N 2 հավելվածում ներկայացված հայտարարության օրինակելի ձևը: Կարևոր է, որ բոլոր տնտեսվարողների համար մշտապես հասանելի է ստուգաթերթերի բովանդակությունը, այն ազատ տեղադրված է համապատասխան մարմինների պաշտոնական կայքէջերում, և հնարավոր բարդություններից խուսափելու համար գործարարից պահանջվում է ծանոթանալ իր բիզնեսի կազմակերպմանը ներկայացվող պահանջներին, պահպանել դրանք ելնելով առաջին հերթին սպառողների և իր աշխատակիցների կյանքի ու առողջության պահանջներից:

Ստուգաթերթերով ստուգումների մոտեցումների մասին ծանուցումը չի վերաբերում հարկային և մաքսային մարմինների կողմից իրականացվող ստուգումների, ՀՀ տնտեսական մրցակցության պաշտպանության պետական հանձնաժողովի, ՀՀ ազգային վիճակագրական ծառայության կողմից իրականացվող ստուգումների, ինչպես նաև ՀՀ պետական բյուջեի կատարման համար իրականացվող աշխատանքների` ներառյալ գնումների գործընթացի ճշտության և օրինականության նկատմամբ հսկողությանը:

Օրեր առաջ հայտնի դարձավ, որ տնտեսական աճ է գրանցվել 3.8 տոկոս, այն դեպքում, երբ միջազգային կառույցները բացասական կանխատեսումներ էին անում, այսօր՝ կառավարության ղեկավարը հայտարարեց ստուգումների կասեցման մտադրությն մասին: Իհարկե, հաղթանակը կլինի այն, որ մենք կունենանք կայուն զարգացող տնտեսություն, և հստակ գիտակցություն, որ գործարարությունն է ձևավորում մեր բյուջեի հիմնական մուտքերը, որ պետական մարմինների նպատակն է հնարավորինս աջակցել և խրախուսել այս դժվարին ժամանակներում տնտեսվարողին, այդ ժամանակ, վստահ եմ, վերջինս էլ չի փորձի թաքցնել իրական շրջանառությունը, խուսափել հարկերից, կամ ավելի լավ կյանք փնտրել օտար ափերում: