Ավարտվել է Երեւանում 57-ամյա տղամարդու սպանության դեպքի առթիվ հարուցված քրեական գործի նախաքննությունը

ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժնում ավարտվել է Երեւանի բնակիչ, 1960թ. ծնված Արմեն Սուրմենելյանի սպանության դեպքի առթիվ հարուցված քրեական գործի նախաքննությունը:

57-ամյա տղամարդու դին հայտնաբերվել էր 2017թ. հունվարի 20-ին` ժամը 20:55-ին,  Երեւան քաղաքի Թումանյան փողոցի բնակարաններից մեկում` կրծքվանդակի ձախ կեսի շրջանում ծակած-կտրած վնասվածքներով:

Դեպքի առթիվ ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժնում հարուցված քրեական գործով ձեռնարկված մեծածավալ քննչական եւ դատավարական այլ գործողությունների արդյունքում բավարար ապացույցներ են ձեռք բերվել առ այն, որ Արմեն Սուրմենելյանը կյանքի հետ անհամատեղելի վնասվածքներն ստացել է ընկերոջ կողմից՝ վերջինիս հետ ծագած վիճաբանության ժամանակ:

Մասնավորապես՝ նախնական քննության տվյալներով՝ 2017թ. հունվարի 20-ին՝ երեկոյան, Ա.Սուրմենելյանը հյուրընկալվել է ծանոթի բնակարանում, ում հետ տեւական ժամանակ գտնվել է մտերիմ հարաբերությունների մեջ: Նշված բնակարանում վերջիններս միասին ալկոհոլ են գործածել: Այնուհետեւ նրանց են միացել Երեւանի եւս երկու բնակիչ։ Որոշ ժամանակ անց Ա.Սուրմենելյանի եւ հյուրընակալողի միջեւ կենցաղային հարցերի շուրջ վիճաբանություն է սկսվել, որի ընթացքում վերջինս իր մոտ գտնվող դանակով երկու անգամ հարվածել է Ա.Սուրմենելյանի կրծքավանդակի առաջային մակերեսի ձախ կեսին՝ պատճառելով կյանքի հետ անհամատեղելի վնասվածքներ:

Ձեռք բերված բավարար ապացույցների համակցությամբ՝ տանտիրոջը մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով: Նրա նկատմամբ որպես խափանման միջոց է ընտրվել կալանավորումը:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: