Սահմանադրական նոր նախագծի մասին խոսում են մարդիկ, ովքեր անգամ գործող սահմանադրությունից տեղյակ չեն

Գևորգ Դարբինյանը ֆեյսբուքյան իր էջում գրում է.

Սահմանադրական նոր նախագծի մասին ում խելքն ինչ բրդում է, հրապարակավ ասում է: Նույնիսկ էն մարդիկ, ովքեր անգամ գործող սահմանադրությունից տեղյակ չեն:

Ոմանք պնդում են, որ նոր նախագծի ընդունման դեպքում Կառավարությունն ու վարչապետը դառնում են անվերահսկելի:

Մյուսներն ասում են` չէ, Ազգային ժողովն է դառնում անվերահսկելի:

Երրորդներն էլ ասում են, թե անվերահսկելին դառնում է իշխող կուսակցությունն ու դրա նախագահը, ով կարող է դառնալ հավերժ «գենսեկ»` առանց բացատրելու, թե ինչու դա հնարավոր չէ գործող սահմանադրությամբ ու գործող կառավարման համակարգով: Կողմնորոշվեք վերջապես:

Տեղին-անտեղին խոսելն ամենևին ո՛չ ձեր տեղեկացվածության, ո՛չ ադեկվատության, ո՛չ էլ բանիմացության մասին չի խոսում, իսկ չիմացած, չպատկերացրած բանի մասին խոսելը` միայն նրա համար, որ ձեր ընկերներին ցույց տաք, թե ինչ կրեատիվ ձևերով կարող եք քլնգել առանց այն էլ բազմաթիվ թերություններով, բայց նաև կարևոր նորույթներով նախագիծը և այն ներկայացնողներին, ավելի շատ նեղմտության ու կոմպլեքսայնության արտահայտություն է:

Նախագծի ներկայացումից անցել է ավելի քան մեկ շաբաթ: Բայց այդ ընթացքում ոչ մի լուրջ բովանդակային բանավեճ չի ծավալվել: Եղել են մի քանի վերլուծությունների փորձեր միայն: Նախապաշարմունքային ու կանխատրամադրված այն վերաբերմունքը, որ նախագծի վերաբերյալ դրսևորում են թե այն ներկայացնողները և թե դրա վրա ծիծաղողները, ուղղակի դրա հնարավորությունը չեն տալիս` լակմուսի թղթի նման ցույց տալով, թե ինչպիսի պլինտուսային մակարդակի է մեզ մոտ առհասարակ բանավեճի, անգամ տեսակետների փոխանակման կուլտուրան, և թե ինչպես է սիրողականությունն ու մակերեսայնությունը կլանել ամեն ինչ: Եվ այս մթնոլորտում դեռ մտածում ենք ինչ-որ զարգացման մասի՞ն: