Հայաստանի հավաքականը ևս կիմանա ֆուտբոլի Աշխարհի 2018թ.-ի առաջնության ընտրական փուլի վիճակահանությանը

Մենուա Մեհրաբյանը ֆեյսբուքյան իր էջում գրում է.

Շաբաթ օրը տեղի կունենա ֆուտբոլի Աշխարհի 2018թ.-ի առաջնության ընտրական փուլի վիճակահանությունը: Հայաստանի հավաքականը եւս, կիմանա իր մրցակիցներին: Բայց, միշտ իմանում ենք, ընդամենը. ոչինչ ավելին: Ինչպես յուրաքանչյուր նմանատիպ վիճակահանությունից առաջ, այս անգամ նույնպես, հայ ֆուտբոլասերը սրտի թրթիռով է սպասում մեր ընտրանու առաջիկա մրցակիցներին:

Ոմանք սպասում են՝ իմանալու, թե աշխարհահռչակ ո՞ր ֆուտբոլիստին են տեսնելու սեփական աչքերով, ո՞ր ուժեղ հավաքականն է ժամանաելու Երեւան, իսկ ոմանք էլ՝ հասկանալու. վերջապես խոշոր ստուգատեսներում մեր հավաքականին տեսնելու հեռանկար կա՞ արդյոք: Առայժմ հայ ֆուտբոլասերը միայն «բավարարվել է» հույսեր փայփայելով: Մենք ունեցել ենք մեզ համար ընդունելի վիճակահանություն, ունեցել ենք խմբից դուրս գալու հնարավորություն, բայց, ինչպես միշտ, ձախողվել ենք: Այս անգամ, իրավամբ, մեր ֆուտբոլասերների սրտում, թեկուզ ամենախորը եւ փոքր անկյունում, կրկին կա այդ հույսը:

Կարծես թե, մնում է միայն տեղեկանալ, թե որ հավաքականների ընկերակցությամբ ենք սկսելու ճանապարհը դեպի Ռուսաստանի խաղադաշտեր: Բայց, ամեն ինչից զատ, անհանգստանալու առիթ է տալիս հենց մեր հավաքականի խաղը: Արմատական փոփոխություններ են անհրաժեշտ՝ նախեւառաջ խաղային տեսանկյունից: Անհրաժեշտ են նոր մտահղացումներ, նոր մոտեցումներ, թարմ մտածելակերպ, կազմի համալրում եւ ուժեղացում... Թվարկել կարելի է երկար: Սակայն այս պահին ուշադրությունը, առաջնահերթ, ուղղված է վիճակահանությանը:

Ո՞ր հավաքականների հետ խաղալու դեպքում հնարավորություն կունենանք դուրս գալ խմբից:

Հաշվի առնելով առաջին զամբյուղի ուժեղ կազմը՝ կարծում եմ, որ ընդունելի տարբերակը Ռումինիայի ընտրանին է:

Երկրորդ զամբյուղը՝ իր ուժով, ամենեւին չի զիջում առաջինին: Բայց, ի տարբերություն առաջին զամբյուղից ընտրված միակ ընդունելի տարբերակի, երկրորդում կան 3 հավաքականներ, որոնց կարելի էր տեսնել մեր խմբում. Սլովակիա, Դանիա, Բոսնիա:

Երրորդ զամբյուղ. այստեղ հավաքված են հավաքականներ, որոնք, կարելի է ասել, հավասարազոր են: Բայց «նախապատվությունը» միգուցե կարելի է տալ Հունաստանին:

Չորրորդ զամբյուղի ակնհայտ «ետնապահը» Ֆարերյան կղզիներն են (ընդունելի է նաեւ Էստոնիայի տարբերակը): Իսկ վերջին զամբյուղից կընդունենք Սան-Մարինոյի եւ Անդորրայի թեկնածությունները: