Արարատի մարզում աղբի 100%-ը ցանկանում են օգտակար նյութերի վերածել

Արարատի մարզի Վեդի քաղաքում աղբի 100%-ը ցանկանում են վերածել հումքի եւ բիոգազի: NEWS.am-ի թղթակցի հետ զրույցում այս մասին հայտնեց «Մաքուր երկիր» ընկերության տնօրեն Յուրա Հարությունյանը: Վերջերս ընկերության ծրագիրը հավանության է արժանացել ՀՀ կառավարության կողմից՝ աջակցության համար:

Ծրագրի առավելագույն նպատակն աղբի լիարժեք վերամշակումն է. մաքրված միրգ-բանջարեղենի մնացորդները բիոգազի կվերածվեն, իսկ թուղթը, մետաղն ու ապակին՝ հումքի եւ նոր արտադրանքի: Բիոգազով շուրջ մեկ հեկտար տարածքով ջերմոցներ կտաքացնեն, հոսանք կստանան՝ բերքի պահման սառցարանների համար: Հոլանդացի մասնագետնենրի օգնությամբ կազմված նախագիծը 7 մլն եվրո է գնահատվում: Այն կազմել են Վերակառուցման եւ զարգացման եվրոպական բանկի աջակցությամբ:

Առաջին քայլն աղբի տեսակավորման կայանը կլինի: Դրա համար հարկավոր է 70 մլն դրամ գումար գտնել (շուրջ 145 հազար դոլար), որն ընկերությունը ցանկանում է ստանալ արտոնյալ պայմաններով վարկի տեսքով:

«Վարչապետի պատասխանին ենք սպասում, արդյո՞ք հնարավոր է ավելի ցածր տոկոսադրույք ստանալ: Եթե հարցը լուծվի, տեսակավորման կայանը մինչեւ տարեվերջ կկառուցենք, իսկ մնացյալ աշխատանքները կթողնենք հաջորդ տարվա»,- հավելեց Հարությունյանը:

Ընկերությունը Վեդի քաղաքում եւ հարակից 17 գյուղերում աղբահավաքման աշխատանքներ է իրականացնում 2010 թվականից՝ բնակիչներին պոլիէթիլենային տոպրակներ բաժաներով: USAID-ի աջակցությամբ ընկերությունն աղբի տեսակավորման առաջին փորձերը սկսել է՝ բնակիչներին նաեւ առանձին պարկեր բաժանելով թղթի համար:

Հիմա ընկերությունում շուրջ 30 մարդ է աշխատում, աղբի տեսակավորման կայանում աշխատանքի կանցնի եւս 18 մարդ, իսկ ամբողջական համալիրում ավելի քան 100 աշխատատեղ կլինի: