ԱՄՆ-ում 5-ամյա որդու սպանության համար մեղադրվող Արամազդ Անդրեսյանն ընդունել է մեղքը

Կալիֆորնիայում 5-ամյա որդու սպանության համար մեղադրվող Արամազդ Անդրեսյանը դատարանում ընդունել է իր մեղքը, հայտնում է CBS News-ը: Նրան սպառնում է 25 տարվա ազատազրկում: Նրա դատավճիռը կհնչեցվի օգոստոսի 23-ին:

Մեղադրական կողմի կարծիքով՝ 35-ամյա Արամազդ Անդրեսյանը «Դիսնեյլենդ» այցելությունից հետո սպանել է իր որդուն՝ իր կնոջը վերադարձնելու համար:

Քննիչները հրաժարվել են նշել, թե ինչպես է տղան սպանվել: Այնուամենայնիվ, փաստաբան Ամբրոսիո Ռոդրիգեսը դատական նիստից հետո լրագրողներին հայտնել է, որ իր պաշտպանյալը խոստովանել է իր մեղքը և որ տղայի սպանությունը պլանավորված չի եղել:

Ռոդրիգեսի խոսքով՝ Անդրեսյանը ճանաչել է մեղքը մահապատժից խուսափելու համար:

Ավելի վաղ հաղորդվել է, որ Կալիֆորնիայի 35-ամյա բնակիչ Արամազդ Անդրեսյան-ավագը, որը կասկածվում է 5-ամյա որդու՝ Արամազդ Անդրեսյան-կրտսերի սպանության համար, չի պատրաստվում ընդունել մեղքը:

Հիշեցնենք, որ ապրիլի 21-ին անհետացած փոքրիկի դին հուլիսի 1-ին հայտնաբերվել է Սանտա Բարբարայի Կաչումա լճի մոտ:

Անդրեսյան-ավագը խոստովանել էր, որ ժամանցային այգում գտնվելու ժամանակ արգելված դեղամիջոցներ է ընդունել, ինչից հետո, իր խոսքով, չի հիշում, թե ինչ է պատահել երեխայի հետ: Հետագայում տղամարդը հրաժարվել է համագործակցել իրավապահների հետ ու նրանց թյուր տեղեկություններ է տրամադրել, ինչից հետո հայտնվել է կասկածի տակ:

Ինչպես ավելի վաղ հայտնել էր Armday.am-ը, Արամազդ Անդրեսյանին 5-ամյա որդու սպանության գործով մեղադրանք է առաջադրվել:

Մամուլի ասուլիսի ժամանակ գլխավոր դատախազ Ջեքի Լեյսին հայտարարել էր, որ քննիչները բավականաչափ ապացույցներ են հավաքել 35-ամյա Անդրեսյանին որդու սպանության համար կասկածելու համար:

Մեղադրող կողմի կարծիքով՝ 35-ամյա տղամարդը, ով Կալիֆորնիա նահանգի հարավային հատվածի բնակիչ է, որդու հետ «Դիսնեյլենդ» գնալուց հետո սպանել է նրան ու դին թաքցրել: Հայտնի է, որ որդու անհետացումից հետո հայրը մեկնել է Լաս Վեգաս, զվարճացել ու իրեն ամենևին էլ երեխայի համար անհանգստացող ծնողի պես չի պահել: Այնուհետև նա փորձել է փոխել արտաքինը, սափրել է մորուքը, ներկել մազերը՝ քննիչների մոտ տպավորություն ստեղծելով, թե փորձում է լքել երկիրը: