Գյումրին մի ամբողջ օր վերածվել էր նորաձևության կենտրոնի.լուսանկարներ

Գյումրի քաղաքը մի ամբողջ օր վերածվել էր նորաձևության կենտրոնի: Գյումրու Սև Ամրոցում էին հավաքվել նորաձևության սիրահարներ Երևանից, Գյումրիից:

«ArmMod Fashion»-ը որոշել էր նորաձեւության ցուցադրություն կազմակերպել Գյումրիում: Նախագծի նպատակն է նպաստել հայկական նորաձեւության զարգացմանը եւ աջակցել սկսնակ մոդելավորողներին։ «Հայկականը նորաձեւ է, Հայաստանում արտադրվածը լավագույնն է» խորագիրը կրող արդեն 7-րդ ցուցադրությունն էր, որին մասնակցում էր երեւանցի ու գյումրեցի 15 երիտասարդ դիզայներ:

«Նախորդ ցուցադրություններն անցկացվել են Երեւանում, այս անգամ Գյումրի գալով` փորձում ենք խրախուսել նաեւ գյումրեցի դիզայներներին, որ նրանք էլ առաջին քայլն անեն, որը կարող է լինել կարեւոր ու վճռական քայլ: Բացի դրանից, մեր նախագիծն ուներ «Արի Գյումրի» կարգախոսը՝ խթանելով ներքին տուրիզմը»,- ասաց Գյումրիում շոուն նախաձեռնող մոդել Նաիրա Գրիգորյանը:

Պետք է նշել, որ Գյումրիում սա առաջին մեծամասշտաբ fashion իրադարձությունն էր, Հայաստանի երկրոդ ամենամեծ քաղաքում նորաձևության տներ չկան, չնայած դրան գյումրեցի երիտասարդ դիզայներները աշխատում են ու ուղիներ փնտրում այդ ոլորտում հաջողության հասնելու համար: Այդ իմաստով ArmMod Fashion նախաձեռնությունը լավ հնարավորություն էր : Բացի այդ, հյուրերի համար էլ հիանալի առիթ էր այցելել Գյումրի , մասնակցել Գյումրի քաղաքային տուրին և երեկոյան ներկա գտնվել ցուցադրությանը:

Ի դեպ նախագիծը համագործակցում է AFD International Fashion Day-ի հետ, որը ամեն անգամ սկսնակ մոդելավորողներից մեկին հնարավորություն է տալիս անվճար մասնակցել Մոսկվայում կայանալիք շքեղ ցուցադրությանը: Այս անգամ այդ հաջողակը Գյումրեցի երիտասարդ դիզայներ Դիանա Չալիկյանն էր: