Ե՞րբ կարող է լինել Ավետիսյանների սպանության գործով դատավարությունը

Գյումրիում սպանված Ավետիսյանների գործով դատավարությունը հնարավոր է լինի օգոստոսի վերջին կամ սեպտեմբերի սկզբին: Այս մասին NEWS.am-ի թղթակցի հետ զրույցում ասաց տուժողի իրավահաջորդի ներկայացուցիչ Երեմ Սարգսյանը:

Նա միանշանակ բացառեց լրատվամիջոցներում տարածված տեղեկությունները, թե մինչեւ օգոստոս 10-ը դատական նիստ կարող է լինել: «Բավականին փուլեր կան անցնելու, դեռ պետք է քրեական գործի նյութերը տան, ժամանակ խնդրենք ծանոթանալու համար, գուցե միջնորդություններ լինի անելու, այնպես որ բացառում եմ, որ մինչեւ ամսի 10-ը նիստ լինի: Եթե այլ գործողությունների կարիք չլինի, ապա օգոստոսի վերջ կամ սեպտեմբերի սկիզբ հնարավոր է նիստ լինի»,-ասաց փաստաբանը:

Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր: Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին: Փետրվարի 3-ին ՀՀ գլխավոր դատախազ Գեւորգ Կոստանյանը բողոքի ակցիայի ճնշման ներքո միջնորդությամբ դիմել էր ՌԴ գլխավոր դատախազ Յուրի Չայկային՝  Գյումրիում հունվարի 12-ին տեղի ունեցած դաժան սպանության դեպքով հարուցված քրեական գործի վարույթը ՀՀ իրավապահներին փոխանցելու խնդրով: Գործը արդեն փոխանցվել է ՀՀ Քննչական կոմիտեին: