Ողբերգական ավտովթար Գյումրի-Երեւան ճանապարհին․ վիրավորներից մեկը փաստաբան է

Երեւան-Գյումրի ավտոճանապարհին այսօր՝ հուլիսի 30-ին, ողբերգական ավտովթար է տեղի ունեցել։  85 կմ հատվածում՝ Լանջիկի ոլորաններում բախվել են Գյումրի քաղաքի բնակիչ 25-ամյա Գրիգոր Մալխասյանի վարած Chevrolet Aveo մակնիշի 37 ML 777 համարանիշի եւ Գյումրի քաղաքի բնակիչ 34-ամյա Արթուր Մանուկյանի վարած Mercedes մակնիշի 34 TD 443 համարանիշի ավտոմեքենաները:

Shamshyan.com-ի փոխանցմամբ, վթարի հետեւանքով 4 հոգի վնասվածքներով տեղափոխվել են՝ 3-ը Գյումրիի բժշկական կենտրոն, մեկը՝ Թալինի բժշկական կենտրոն: Բժշկական կենտրոնում Mercedes-ի վարորդ Արթուր Մանուկյանը մահացել է: Վիրավորներին ավտոմեքենայից դուրս են բերել քաղաքացիները եւ Արտակարգ իրավիճակների նախարարության փրկարար ծառայության Թալինի հրշեջ-փրկարարական ջոկատը: Ըստ նախնական տեղեկությունների, ինչպես նաեւ՝ վթարի ականատեսի պատմածով, մեղավորը եղել է Chevrolet-ի վարորդը, ով դեպի Երեւան ընթանալիս, դուրս է եկել ճանապարհի երթեւեկելի գոտուց եւ ճակատ-ճակատի բախվել դեպի Գյումրի ընթացող Mercedes-ին: Mercedes-ի վարորդը ամուսնացած էր, խնամքին ուներ 3 մանկահասակ երեխա, եւ Mercedes-ը շահագործվում էր որպես տաքսի: Իսկ Chevrolet-ի վարորդ Գագիկ Մալխասյանը մասնագիտությամբ փաստաբան է, որի մեքենայում հայտնաբերվել է լիցքավորված ատրճանակ։