«Էրզրում» պարային համույթի ղեկավարը գումարի դիմաց համույթի հետ կապ չունեցող 18 հոգու փորձել է տանել Իսպանիա. մանրամասներ

«Էրզրում» պարային համույթի ղեկավար Սմբատ Հարությունյանը 2500-ական եվրոյի դիմաց պարային համույթի հետ կապ չունեցող 18 անձանց ընդգրկել է ցուցակում, որպեսզի կազմակերպի նրանց այցը Իսպանիա: Այս մասին Armday.am-ը տեղեկանում է դատական տեղեկատվական համակարգից: Գործը հուլիսի 27-ին ուղարկվել է Կենտրոն և Նորք Մարաշ վարչական շրջանների ընդհանուր իրավասության դատարան և մակագրվել դատավոր Գագիկ Պողոսյանին: Սույն քրեական գործով կա 3 մեղադրյալ՝ Սմբատ Հարությունյանը, Հարություն Քոչարյանը, Արմեն Դարմոյանը: 

Սմբատ Հարությունյանին մեղադրանք է առաջադրվել այն բանի համար, որ նա, հանդիսանալով «Էրզրում» պարային համույթի գեղարվեստական ղեկավար, Իսպանիայում կայանալիք պարի փառատոնին մասնակցելու համար շահադիտական նպատակներով 2500-ական եվրոյի դիմաց համույթի մասնակիցների ցուցակում ընդգրկել է դրա գործունեության հետ որևէ առնչություն չունեցող ՀՀ 18 քաղաքացիների:

Սմբատ Հարությունյանին մեղադրանք է առաջադրվել ՀՀ ՔՕ-ի 319.1 հոդվածի 3-րդ մասի 1-ին կետի հատկանիշներով: 

Հարություն Քոչարյանին մեղադրում են այն բանի համար, որ նա, Իսպանիայում կայանալիք պարի փառատոնին մասնակցելու համար, շահադիտական նպատակներով 2500-ական եվրոյի դիմաց համույթի մասնակիցների ցուցակում ընդգրկել է դրա գործունեության հետ որևէ առնչություն չունեցող ՀՀ 18 քաղաքացինների:

Նրան մեղադրանք է առաջադրվել ՀՀ ՔՕ-ի 329.1 հոդվածի 3-րդ մասի 1-ին կետի հատկանիշներով, նախկինում դատապարտված է:

Արմեն Դարմոյանին մեղադրում են այն բանի համար, որ նա 2015թ ընթացքում կազմակերպել է քաղաքացինների անօրինական միգրացիան` մուտքը «Շենգենյան համաձայնության» պետություններ:

Նրան մեղադրանք է առաջադրվել ՀՀ ՔՕ-ի 329.1 հոդվածի 3-րդ մասի 1-ին կետի հատկանիշներով:

Նրանց նկատմամբ խափանման միջոց է ընտրվել ստորագրությունը չհեռանալու մասին: