Մերի Մարգարյանի մահվանից ուղիղ 2 տարի է անցել. դատաքննությունը մոտենում է ավարտին

Ծննդկան Մերի Մարգարյանի եւ նորածնի մահվանից ուղիղ երկու տարի է անցել, բայց իրավապահները դեռ փորձում են պարզել` ովքեր են մեղավոր ծննդկանի մահվան մեջ:

Մերի Մարգարյանի մահվան գործի առանձնացված մասով փետրվարին նշանակված կրկնակի հանձնաժողովային դատաբժշկական փորձաքննության օրը դեռ չի նշանակվել: Ձգձգումը պարզաբանում են հանձնաժողովի աշխատանքի ծանրաբեռնվածությամբ:

Նշենք, որ առաջին փորձաքննությամբ բժիշկների կողմից թերություններ եւ բացթողումներ են արձանագրվել: Սակայն նախաքննական մարմինը որոշում է կայացրել կրկնակի փորձաքննություն նշանակել: Ի դեպ, եւ առաջին, եւ կրկնակի փորձաքննության նպատակն է պարզել` արդյոք ծննդկանի եւ նորածնի մահվան մեջ մեղավորություն ունեն ծննդատան վարիչ Աշոտ Սիրունյանը, տնօրենի` այն ժամանակվա բուժգծով տեղակալ Դավիթ Մխիթարյանը, հուլիսի 26-ին հերթապահ բժիշկ Տիգրան Սարգսյանն ու ռեանիմատոլոգ Արամ Գրիգորյանը:

Ծննդկանի մահվան գործից առանձնացված մի մասի քննությունն էլ դատարանում շարունակվում է: Անցած ամռանը սկսված դատաքննությունը մոտենում է ավարտին: Արդեն իսկ ցուցմունք են տվել ամբաստանյալներ, «Շենգավիթ» բժշկական կենտրոնի բժշկուհիներ, հղիությունը վարած Շուշանիկ Բախշյանն ու հուլիսի 25-ի հերթապահ Անի Բաբելյանը: Ամբաստանյալներն իրենց մեղավոր չեն ճանաչել: Թե ինչ դատավճիռ կկայացնի դատավորը, շատ շուտով պարզ կլինի: