Ինչ է պետք անել, եթե ձեզ մեղու կամ իշամեղու է խայթել (նկարազարդումներ)

Երբեմն տարբեր տեսակի միջատներ կարող են լուրջ սպառնալիք ներկայացնել մարդկանց համար. այսպես, օրինակ, մեղուների և իշամեղուների խայթը մասնավորապես վտանգավոր է նրանց համար, ովքեր ալերգիա ունեն դրանցից:

AdMe.ru-ն պատմել է՝ ինչ միջոցներ է պետք ձեռնարկել, եթե ձեզ կծել են միջատները:

Անհապաղ շտապօգնություն կանչեք ալերգիկ ռեակցիայի դեպքում

Եթե ձեր կամ ձեր կողքին գտնվողի մոտ ալերգիկ ռեակցիա է առաջացել միջատների խայթոցից, հնարավորինս արագ շտապօգնություն կանչեք: Ալերգիայի ախտանիշները հետևյալն են.

գլխապտույտ,

այտուցված լեզու,

մաշկային ցան,

դժվարացած շնչառություն:
 

Հեռացրեք խայթը

Մեղուները խայթելիս խայթ են թողնում: Այն կարելի է հեռացնել ունելիով կամ եղունգներով, ինչպես նաև քերել տափակ առարկայով, օրինակ՝ պլաստիկ քարտի եզրով՝ նախապես լվանալով վերքը: Այս ամենը պետք է անել շատ զգույշ՝ չսեղմելով խայթի երևացող մասը, որպեսզի ավելի շատ թույն չներթափանցի օրգանիզմի մեջ:

Սառը կոմպրես դրեք

Խայթոցից հետո բորբոքումը և այտուցումն անխուսափելի են, սակայն դրանք կարելի է նվազագույնի հասցնել՝ վնասված մաշկին սառը բան դնելով: Լավագույն տարբերակը կտորով փաթաթված սառույցն է, սակայն դրա բացակայության դեպքում կարելի է ցանկացած մետաղյա իր օգտագործել:

Մշակեք խայթված հատվածը

Սկզբում վերքը պետք է լվանալ օճառաջրով, այնուհետև բարակ շերտով հակաբորբոքային քսուք քսել: Քսուքի փոխարեն կարելի է սոդայից և ջրից պատրաստված խիտ մասսա օգտագործել: Դրանից բացի, կօգնի մեղրը կամ ատամի մածուկը. միջոցներից մեկը քսեք վերքի վրա, ծածկեք կտորով կամ մառլայով և լվացեք. մեղրը՝ մի ժամից, իսկ ատամի մածուկը՝ 20-30 րոպեից:

Դեղամիջոց ընդունեք

Ցավազրկող և հակագիստամինային դեղամիջոցներն անհրաժեշտ են տհաճ զգացողություններից և ալերգիկ ռեակցիայից ազատվելու համար: Սակայն ցանկացած դեղահաբ ընդունելուց առաջ պետք է հետևել հրահանգներին, իսկ փոքր երեխաներին ցավազրկող չի կարելի տալ: